Lufta kundër evazionit – Denaj: Nuk është aksion, sfida jonë është vazhdimësia
Ministria e Financave dhe Ekonomisë, Anila Denaj, e shoqëruar nga drejtorët e Doganave dhe të Tatimeve, zhvilloi mëngjesin e të enjtes një takim me përfaqësues të biznesit lidhur me fushatën kundër informalitetit.
Ministrja Denaj tha se lufta ndaj informalitetit nuk duhet kuptuar si një valë fushatash, por si një përpjekje e vazhdueshme për të luftuar evazionin fiskal dhe për të mbështetur konkurrencën e ndershme. Sipas saj, në bazë të analizave të rrezikut, u vendos që plani operacional i kësaj vere të përqendrohet kryesisht te sektorët e hoteleri-turizmit, ndërtimit dhe produkteve të akcizës.
Përfaqësuesit e biznesit shprehën mbështetje për luftën ndaj informalitetit dhe masave që sigurojnë konkurrencën dhe kushtet e barabarta të aktivitetit për të gjitha sipërmarrjet. Por, nga ana tjetër, ata kërkuan uljen e subjektivizmit në kontrolle, duke përmirësuar mekanizmat e inspektimit elektronik.
Përfaqësuesit e bizneseve turistike kërkuan që kontrollet e administratës tatimore të jenë më të shpërndara gjatë gjithë vitit dhe të krijohet një historik i sjelljes së tatimpaguesve. Kjo do të shmangte kontrollet e vazhdueshme në periudhën kur bizneset e turizmit kanë një ngarkesë të madhe pune.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.