Lufta kundër kancerit të gjirit – Manastriliu: Mamografi falas në çdo spital rajonal, diagnostikimi i hershëm të shpëton jetën
Në muajin e ndërgjegjësimit për kancerin e gjirit, ministrja e Shëndetësisë dhe Mbrojtejs Sociale, Ogerta Manastriliu i ka bërë apel grave dhe vajzave të mos neglizhojnë shëndetin e tyre dhe të kryejnë në kohë ekzaminimet për këtë sëmundje të rëndë. Sipas saj tashmë çdo spital rajonal është pajisur me mamografi, ndërkohë që ekzaminimi është falas.
“Pandemia ka pasur efektet e saj në jetët tona. Për fat të keq duke krijuar vonesa në kontrollet rutinë për shëndetin, sidomos tek gratë. Ndaj në këtë tetor rozë do t’i lutesha çdo gruaje të marrë vetëm 30 minuta nga koha e saj, të bëjë vetëkontrollin e gjirit dhe të kryejë mamografinë. Programi ynë i diagnostikimit të hershëm të kancerit të gjirit ka siguruar mamografitë në çdo spital rajonal nga veriu në jug dhe ky shërbim është falas”.
Ndërkaq, në mesazhin që çel fushatën e ndërgjegjësimit, tre gra që po fitojnë betejën me sëmundjen e rëndë, kanë theksuar rëndësinë e kontrollit dhe mosneglizhimin e sëmundjes.
“E lashë pas dore. Ka qenë dashuria dhe vëmendja e familjarëve dhe e miqve të mi më të ngushtë.”, thotë në mesazhin e saj gazetarja Rezarta Reçi.
“Ishte beteja më e vështirë e jetës time. Eksperiencë e cila më kërkoi forcë dhe kurajo për ta përballuar. E gjeta forcën dhe kurajon përmes suportit të familjes time dhe përkushtimit të mjekëve”, shprehet Mimoza Dosti.
“Sot i them çdo gruaje, mos neglizho! Lufto për jetën! Ajo është e shtrenjtë”, thotë Mimoza Groballi.
Sipas ekspertëve të shëndetit publik është e rëndësishme që kanceri i gjirit të zbulohet sa më herët, pasi në këtë mënyrë edhe mundësitë e shërimit janë më të mëdha. Mamografia është një ekzaminim radiografik, që e zbulon kancerin e gjirit në faza të hershme, 2-3 vjet para shfaqjes së shenjave. Po ashtu, vetëkontrolli i gjriit nga gruaja, që përfshin shikimin dhe prekjen e gjirit dhe nyjeve limfatike është një formë për të zbuluar këtë sëmundje.
Nga ana tjetër, ekzaminimi klinkik i gjirit është një vizitë e kryer nga një personel mjekësor i trajnuar, i cili mund të kapë deri në 65% të rasteve. Tetori është muaji i ndërgjegjësimit për kancerin e gjirit është një fushatë vjetore ndërkombëtare që synon të shpërndajë informacion dhe të edukojë njerëzit për rëndësinë e shëndetit të gjirit, për zbulimin e hershëm të kancerit të gjirit te gratë dhe vajzat në të gjithë botën.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.