Lufta kundër trafikimit të personave – Xhafaj: Domosdoshmëri bashkëpunimi në nivel kombëtar dhe rajonal
Lufta kundër trafikimit të personave nuk mund të përmbushet nga një qeveri apo shtet i vetëm pa forcimin dhe bashkëpunimin në nivel kombëtar dhe rajonal. Kështu u shpreh ministri i Brendshëm, Fatmir Xhafaj në deklaratën e tij pas raportit të publikuar nga Departamenti i Amerikan i Shtetit.
Sipas këtij të fundit, janë disa fusha kyçe ku qeveria shqiptare nuk i ka përmbushur plotësisht standardet minimale për eliminimin e trafikimit, pavarësisht përpjekjeve që po bën në këtë drejtim.
“Qeveria vazhdoi të penalizonte viktimat për akte të paligjshme kryer si pasojë e drejtpërdrejtë e nënshtrimit ndaj trafikimit njerëzor. Qeveria raportoi më pak ndjekje penale dhe dënime, dhe autoritetet vazhduan të hetonin dhe ndiqnin penalisht disa trafikantë për veprën më të lehtë të shfrytëzimit të prostitucionit. Qeveria vonoi financimin për strehat e administruara nga OJQ-të dhe nuk aplikoi me konseguencë hetime dhe ndjekje penale duke pasur viktimën në qendër. Policia nuk identifikoi në mënyrë konseguente viktimat e trafikimit mes individëve në prostitucion dhe inspektoratit të punës i mungonte trajnimi për të identifikuar viktimat e punës së detyruar”, thuhet ndër të tjera në raport.
Ndërkohë, Xhafaj u shpreh se lufta kundër trafikimit të personave është një ndër prioritetet kryesore të qeverisë shqiptare, duke shtuar më tej se ka ende shumë për të bërë në këtë drejtim.
“Është përgjegjësia e gjithsecilit prej ne për të marrë hapat e duhur për asgjësimin e këtij fenomeni, për të ndërmarrë hapat e duhura se për hir së të vërtetës edhe ne si qeveri edhe të gjithë aktorët e tjerë kanë ende shumë në këtë aspekt”, tha Xhafaj.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.