Lufta ndaj krimit ndërkombëtar – Shqipëri-SHBA, shkëmbim informacioni për udhëtarët në kohë reale

Shqipëria dhe Shtetet e Bashkuara të Amerikës do të shkëmbejë informacion personal mbi udhëtarë specifikë, si një mjet për të luftuar krimin ndërkombëtar. Kuvendi i Shqipërisë pritet të miratojë një memorandum bashkëpunimi  të propozuar nga pala amerikane, që ka për qëllim minimizimin e rreziqeve që lidhen me shfrytëzimin kriminal dhe terrorist të udhëtimit ndërkombëtar, si dhe kërcënimeve të tjera në fushën e sigurisë kufitare.

Ndërkohë që, informacioni personal lidhet me të dhëna specifike biografike si dhe hollësi të tjera mbi fluturimin, të mbledhura përpara nisjes. Në bazë të memorandumit, Deparatmenti i Kufirit dhe Migracionit, në varësi të disponueshmërisë së fondeve do t’u kërkojë të gjitha kompanive të fluturimit informacion në kohë reale. Gjithashtu, kjo drejtori do të mundësojë personel të dedikuar për të shqyrtuar informacionin mbi udhëtarin si dhe ta transferojë atë në kohë reale pranë departamentit amerikan të sigurisë së brendshme.

Sipas relacionit që shoqëron memorandumin në Kuvend, ky bashkëpunim do të vendosë një nivel të lartë sigurie, duke realizuar përmbushjen e detyrimeve ndërkombëtare në zbulimin, parandalimin dhe hetimin e krimeve që lidhen me shfrytëzimin kriminal dhe terrorist të udhëtimit ndërkombëtar.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.