Lufta ndaj ndryshimeve klimatike – Parisi me strategji të re, projekton ndërtesën e lartë me 2 mijë bimë

Parisi do të ketë së shpejti një ndërtesë të gjelbëruar, e projektuar nga firma italiane Stefano Boeri Architetti. Nga jashtë është parashikuar të ketë rreth 2000 pemë, bimë dhe shkurre që do të mbushin fasadën, çatinë dhe ballkonet e ndërtesës. Brenda saj , ndërtesa pritet të ketë apartamente luksoze, zyra dhe dyqane të vogla.

E quajtur Forêt Blanche (“Pyll i Bardhë”), ndërtesa prej 177 metra e gjatë do të ketë dritare të mjaftueshme për rrezet e diellit dhe për të soditur pamjet e qytetit. Pjesa më e madhe e fasadës së saj është parashikuar të jetë prej druri.

Apartamente, të cilat përfshijnë ballkone, do të vendosen në katet e sipërme, ndërsa zyrat dhe dyqanet do të jenë në katet e poshtme. Edhe pse firma ka njoftuar se planet për ndërtimin e saj kanë përparuar, ende nuk ka përcaktuar një afat kohor se kur do të përfundojë ajo.

Sipas arkitektëve, përmes këtij projekti, kjo ndërtesë ka për qëllim të shkojë përtej konceptit të gjelbër si një dekorim i thjeshtë, duke synuar një strukturë arkitekturore që të marrë sfidën e luftimit të ndryshimeve klimatike dhe rritjen e biodiversitetit në konteste urbane.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.