Lufta tregtare po lë pasoja – Rriten me 128% kostot e transportit nga Kina në SHBA
Kosto e transportit të mallrave nga Kina drejt Shteteve të Bashkuara të Amerikës është më shumë se dyfishuar si pasojë e luftës tregtare mes dy ekonomive më të mëdha të botës.
Kjo ka ardhur si rrjedhojë e nxitimit të eksportuesve kinezë për të çuar dërgesat e tyre drejt SHBA, përpara hyrjes në fuqi të tarifave. Kështu, tarifat e transportit të mallrave janë rritur me pak më shumë se 100% gjatë vitit të fundit, tregojnë të dhënat më të fundit.
Kështu, çmimet e transportit të mallrave nga Kina drejt bregut perëndimor të Shteteve të Bashkuara janë rritur me 128%, ndërkohë që drejt brigjeve lindore janë rritur me 123%, në krahasim me të njëjtën periudhë të një viti më parë.
Për të kuptuar impaktin e luftës tregtare në këtë ecuri, mjafton të themi se mes Kinës dhe Europës, tarifat e transportit janë rritur me vetëm 11% gjatë së njëjtës periudhë kohore.
Edhe importuesit kanë dhënë një shtysë në mënyrë që dërgesat e tyre të vijnë brenda datës 1 Janar, kur edhe hyn në fuqi tarifa prej 10%.
Kjo gjë ka nxitur ndjeshëm çmimet e transportit. Tarifat që do të hynin në fuqi më 1 Janar janë shtyrë si pasojë e armëpushimit 90 ditor mes Donald Trump dhe Xi Jinping.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.