Luftë bilanceve të dyta – Rama: Vitin tjetër nuk i tolerojmë më

Që nga vitit i i ardhshëm, qeveria shqiptare do t’u shpallë luftë bilanceve të dyta. Në fjalën e tij gjatë Konferencës së Dytë të Shoqatës Shqiptare të Bankave, kryeministri Edi Rama tha se nuk do të tolerohet më deklarimi në organet tatimore i pasqyrave financiare të ndryshme prej atyre që deklarohen në banka. Sipas tij, informaliteti vazhdon të ketë përmasa të mëdha, edhe mes kompanive më të rëndësishme në vend.

“Duke filluar nga viti ardhshëm shteti shqiptar, qeveria e Shqipërisë, administrata jonë tatimore nuk do të njohë asnjë bilanc të kompanive të papërputhur me bilancet që disponojnë bankat.

Historia e dy bilanceve, ku kur vinte banka, kompanitë tregojnë sa shumë kanë dhe kur vinte shteti, kompanitë tregojnë sa keq janë, do marrë fund nga janari i vitit 2018. Ka dy vjet që e kemi bërë me dije dhe prandaj, të gjitha kompanitë, – sigurisht, objektivi janë kompanitë e mëdha, – duhet ta kenë shumë të qartë”, tha Rama.

Përveçse kërkoi bashkëpunimin e bankave në luftën ndaj informalitetit, kryeministri nuk humbi rast për të promovuar “platformën 1 miliard euro”. Sipas tij, ajo është ndërtuar si një platformë e bashkëpunimit të kompanive private dhe bankave. Për momentin, megjithatë, bankat po tregohen të rezervuara për të shprehur ndonjë entuziazëm eksplicit rreth kësaj platforme. Kryetari i Shoqatës Shqiptare të Bankave, Periklis Drougkas, tha se shqetësimet kryesore për industrinë bankare janë problemet që lidhen me regjistirmin e pronës, korrupsioni, sidomos në drejtësi, informaliteti dhe tarifat e larta të shërbimit përmbarimor.

“Ne jemi të kënaqur me reformat e deritanishme por sistemi bankar dëshiron të shohë më shumë në disa drejtime. Në mënyrë specifike, në sistemin e regjistrimit të pronësisë, duhet qartuar statusi i pronësisë për pasuritë dhe kjo është bërë për mundësimin e garantimit. Duhet garantim i zbatimit të vendimeve gjyqësore për të forcuar besimin tek shteti ligjor, duhet rritur integriteti i praktikave të administratës tatimore, sistemi i taksimit duhet të adoptojë standardet më të mira ndërkombëtare”, tha Drougkas.

Problematikat e lidhura me sistemin e regjistrimit të pronës dhe atë të drejtësisë ngelen ende pengesa të rëndësishme për kreditimin e ekonomisë. Pas përmirësimeve në afatet e ekzekutimit të kolateralit dhe në ligjin e falimentimit, objekt debati është bërë çështja e tarifave të larta përmbarimore, që janë kundërshtuar nga sistemit bankar dhe nga Fondi Monetar Ndërkombëtar.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.