Luftë krimit mjedisor/në sitë pyjet, guroret e lumenjtë – Klosi: Të presësh një pemë, si të vjedhësh një bankë. Veliu: qasje e re nga policia
Prerja e paligjshme e pemëve, shfrytëzimi i shtretërve të lumenjve, i maleve për gurore, ndorja e mjedisit, tashmë nuk janë krime të rëndësisë dytësore, por vepra penale ndaj të cilave parashikohen dënime të rënda. Në konferencën Krimi mjedisor, Siguria mjedisore, siguria kombëtare, të organizuar nga Akademia e Sigurisë dhe me pjesëmarrjen e Ministrisë së Mjedisit, Policisë së Shtetit, OSBE-së e institucioneve të tjera, u trajtuan gjerësisht masat e reja ndaj këtij fenomeni, që tashmë konsiderohet vepër penale. Ministri i Turizmit dhe Mjedisit Blendi Klosi tha se tashmë të presësh një pemë është po aq e dënueshme sa të vjedhësh një bankë, vepër që dënohet deri me 7 vite burg. Ai solli në vëmendje edhe dy aksionet më të fundit të ndërmarrë në bashkëpunim me Policinë e Shtetit falë të cilit u zhdukën guroret në shkelje të ligjit në Malin e Tomorrit dhe atë të Krujës.
Drejtori i Policisë së Shtetit solli në vëmendje qindra të proceduar për ndërtime pa leje, shfrytëzimin e paligjshëm të guroreve e shtretërve të lumenjve, duke theksuar se sfida në të ardhmen do të jetë parandalimi i krimit mjedisor.
Aktualisht, krimet e mjedisit kanë kaluar nën juridiksionin e Ministrisë së Rendit, ndërkohë që Akademia e Sigurisë i ka kushtuar një program të veçantë në kurrikulat e saj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.