“Luftë” kundër “të fortëve” me makina luksoze, Rama: Në skaner pasuritë e paluajtshme, bizneset, llogaritë bankare dhe asetet e dyshimta

“Çdo pasuri e paluajtshme që zotërohet në territorin e Shqipërisë, që nuk justifikohet apo dyshohet si e tillë duhet të kalojë në skaner. Çdo biznes i dyshimtë duhet të kalojë në skaner dhe duhet t’i nënshtrohet një procesi kontrolli ligjor.”

Kështu është shprehur kryeministri Rama, gjatë takimit të Task- Forcës gjatë raportimit në Zyrën Operacionale të Situatës, për luftën kundër kanabisit, ku më tej shtoi se “çdo llogari bankare e dyshimtë apo në pamje të parë e pajustifikueshme, duhet të kalojë në skaner. Kushdo që zotëron asete të tilla duhet të provojë dhe të justifikojë origjinën e tyre, ose duhet sekuestruar. Zotëruesit e tyre duhet të përgjigjen para ligjit”.

Gjatë fjalës së tij, kryeministri Rama ka folur edhe për “të fortët”, të cilët zotërojnë makina luksoze që sfidojnë ligjin dhe sigurinë, sipas tij duhen vënë para ligjit, ndaj ka kërkuar nga policia përkushtim më të madh.

“Individë me një imunitet të marre dhe të imponuar përmes rrugës së veprimtarisë kriminale, nuk duhet të shfaqen si faktorë shoqëror me influencë në komunitetet tona, askush nuk duhet të guxojë t’i bëjë karshillëk. Të kemi të njëjtën qasje si me kanabisin. Makinat luksoze që sfidojnë ligjin, sfidojnë sigurinë publike, pasuritë e paluajtshme të këtyre “shofereve” që i zotërojnë dhe që janë të papunë luksi, llogaritë bankare të pajustifikueshme, biznese të që nuk kanë një historik rritje financiare, duhet t’i nënshtrohen një procesi kapilar dhe rigoroz kontrolli ligjor me shumë përgjegjshmëri dhe shume profesionalizëm”, tha Rama.

Lufta kundër kanabisit

Në mbledhjen e Zyrës Operacionale për luftën kundër kanabisit, kryeministri Rama foli me optimizëm për punën e bërë nga policia e shtetit, duke deklaruar se ky ishte viti me sasinë më të ulët të kultivimit të kanabisit në Shqipëri që prej vitit 1991.

“Drejtuesit në Policinë e Shtetit meritojnë një falënderim të veçantë, është një luftë që vazhdon, dhe sot në këtë fazë të vitit ka hyrë në një kapitull vendimtar. Kam pasur kënaqësinë ta konstatoj edhe nga komunikimet e drejtpërdrejta me ndërkombëtarët se ky është viti me sasinë më të ulet të kanabisit të kultivuar në Shqipëri që prej 1991”.

Sipas Ramës rezultati i arritur në luftën kundër kanabisit ka treguar vlerësimin e ndërkombëtarëve, ku sipas tij BE ka vënë në dispozicion një fond të posaçëm për zgjatjen me një muaj të periudhës së fluturimeve monitoruese.

“Ky rezultat spektakolar nga njëra anë ka krijuar mbresë shumë të fortë te ndërkombëtarët,  por edhe ka nxitur përfshirjen e BE në këtë proces me një fond të posaçëm, për zgjatjen me një muaj të periudhës së fluturimeve monitoruese. Të kemi kontroll të plotë të situatës, pasi është arritur një sukses i rëndësishëm. Ky rezultat është edhe një shembull kuptimplotë se sa shumë mund të bëjë Policia e Shtetit, përmes bashkëpunimit dhe ndërveprimit të të gjitha agjencive ligj-zbatuese në raport me problematika dhe çështje specifike. Rezultatet janë një pasqyrë inkurajuese. Kjo qasje e re është rezultat i planit tonë kombëtar, kërkojmë një shtrirje horizontale dhe vertikale shumë më agresive për të luftuar kundër rrjeteve të kultivimit dhe trafikimit, për të arritur jo thjesht në disa shifra që mund të jenë domethënëse te numri, por te grupet kriminale të ndaluara dhe te asetet kriminale të sekuestruara. Në fazën e parë është matur edhe numri i personave të vënë para përgjegjësisë, numri i rrjeteve dhe elementeve të goditura ishte më i larte. Kemi një goditje në sasi të individëve dhe grupeve, pasi është shkuar me lart në hierarkinë e botës së këtij krimi. Në fazën ku hyjmë tani do të kemi një tregues edhe me të fortë jo me numrin e personave të proceduar, por me numrin e rrjeteve të shkatërruara, me sasinë e aseteve të sekuestruara”, u shpreh Rama.

Osman Dedja/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.