Luftë tregtare edhe me BE – Komisioni kërcënon kundërpërgjigje ndaj tarifave për makinat
Bashkimi Europian do të kundërpërgjigjet nëse Shtetet e Bashkuara rrisin tarifat për importet e makinave europiane, sipas zyrtarëve të Komisionit Europian. Presidenti Donald Trump kërcënoi vendosjen e tarifave në 20%, për të gjithë makinat që prodhohen në fabrikat e BE, 1 muaj pasi administrata e tij nisi një hetim për të zbuluar nëse importet e automjeteve përbëjnë një kërcënim ndaj sigurisë kombëtare.
“Nëse ata vendosin të shtojnë tarifat, ne nuk do të kemi mundësi tjetër përveç se të reagojmë”, tha zv/Presidenti i Komisionit, Jyrki Katainen. Aksionet e makinave europiane pësuan rënie të Premten kur Trump lajmëroi tarifat.
Ford dhe General Motors ranë gjithashtu në vlerë tregu. “Nëse Tarifat dhe Barrierat nuk hiqen menjëherë, ne do të vendosim penalitrete në 20% për të gjithë makinat e tyre që vijnë këtu”, publikoi Trump në Twitter. Departamenti i Tregtisë në SHBA ka afat Shkurtin 2019 për të hetuar nëse importet e automjeteve ose pjesëve të makinave, përbëjnë rrezik për sigurinë kombëtare.
Sekretari i Tregtisë, Wilbur Ross, tha gjatë javës së kaluar se departamenti synon ta përfundojë hetimin në fund të Korrikut apo Gushtit. Trump ka theksuar në mënyrë të vazhdueshme importet e mëdha të makinave gjermane në SHBA.
Trump i tha prodhuesve në një takim në Shtëpinë e Bardhë më 11 Maj se po planifikon tarifa në 20-25% për disa automjete dhe kritikoi ashpër sufiçitin në automjete me Gjermaninë. SHBA kanë aktualisht tarifa në 2.5% për makinat për pasagjerë të importuara dhe 25% për kamionçinat.
BE ka 10% tarifa në makinat e SHBA. Dhoma e Tregtisë në SHBA deklaroi se prodhimi i makinave në vend është dyfishuar në dekadën e kaluar dhe bëri të ditur se tarifat do të godasin pikërisht atë industri që synojnë të mbrojnë. Volkswagen, Daimler dhe BMW ndërtojnë automjete në fabrikat në SHBA dhe BMW është punëdhënësi më i madh në Karolinën e Jugut.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.