Macron po sundon i vetëm – Përçan kundërshtarët, partia e tij e para në sondazhe
Në mungesë të një partie, Emmanuel Macron i cili ka marrë tashmë zyrtarisht detyrën e kreut të shtetit, ka përqafuar një strategji të re, që duket se po rezulton mjaft e suksesshme.
Nëpërmjet motos përça dhe sundo, Macron, jo vetëm që po shkatërron partitë tradicionale, por edhe po bën bashkë pjesëzat që i mungojnë qeverisjes së tij. Macron ka vendosur që në krye të qeverisë së tij të jetë Edouard Philippe, nga radhët e partisë republikane.
Kreu i kësaj partie ndërkohë deklaroi se ky është vendimi i tij personal për ta pranuar detyrën dhe jo i partisë. Philipe është përfaqësues i krahut të mdoeruar të republikanëve, një parti konservatore.
Lëvizja e Macron ka për qëllim të dobësojë kundërshtarët përpara zgjedhjeve parlamentare të qershorit si dhe të fitojë mbështetje të gjerë në elektorat. Një pjesë e madhe e parlamentarëve të partisë socialiste nga ana tjetër i janë përgjigjur me një komunikatë të përbashkët kërkesës së Macron, duke pranuar të bashkëpunojnë me të.
Macron do të garojë në zgjedhjet e qershorit nëpërmjet partisë që e ka quajtur republika në lëvizje, dhe nuk e fsheh aspak synimin, që është pikërisht mazhoranca parlamentare.
Vetëm në këtë mënyrë ai do të mund të vërë në jetë planin e tij ambicioz për të shkurtuar shpenzimet, nxitur investimet dhe krijuar vende pune pas vitesh me radhë dobësi ekonomike.
Republikanët pretendojnë të jenë forca e parë në dhomën e ulët të parlamentit, por nga ana tjetër sondazhet i nxjerrin prapa REM, partisë së sapokrijuar të Macron.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.