Magjistratët në Vetting – Hallunaj, 3 mln pajë nga e shoqja. Malaj, pikëpyetje vila 3 katëshe

E marta ka qenë ditë e ngarkuar për Komisionin e Pavarur të Kualifikimit. Gjatë orëve të paradites para tij janë paraqitur në seancë dëgjimore Gjyqtari i Krimeve të Rënda Dritan Hallunaj dhe Gjyqtari i Apelit Administrativ Artur Malaj.

Hallunajt iu desh të jepte shpjegime për një apartament me sipërfaqe 165 metra katrorë në Tiranë blerë 49 mije euro përmes një kredie 5 milionë euro dhe kursimeve.  Komisioni vërejti se çmimi për metër katrorë rezulton shumë më i ulët nga ai i tregut, ndërkohë që magjistrati shpjegoi se e kishe blerë me çmim okazion, pasi ndërtuesi po kalonte një moment të vështirë financiar. Hallunajt iu desh të jepte shpjegime edhe për një dhuratë prej 30 mijë eurosh nga babai i tij, si dhe 3 milionë lekë nga i vjehrri në formën e pajës për bashkëshorten. Ndërkohë që Gjyqtarit iu desh të argumentonte edhe një vendim për pafajësi, i cili ishte rrëzuar nga Gjykata e Apelit të Krimeve të rënda. Vendimi në fjalë është ankimuar nga ana e Prokurorit të Përgjithshëm.

Pas tij, Gjyqtarit të Apelit Administrativ Artur Malaj iu desh të argumentonte disa pasaktësi në prenotimin dhe blerjen e një apartamenti me sipërfaqe 106 metra katrorë dhe me vlerë 55 mijë euro në Tiranë. Komisioni vërejti mospërputhje mes kontratave të blerjes, çmimeve, e sipërfaqes së apartamentit, si dhe një kredie 5 milionë euro e përdorur për blerjen e tij. Malajt iu desh të jepte përgjigje edhe për dyshimet se ai zotëron një vilë trekatëshe në Vlorë. Komisioni bëri me dije se ka kërkuar dëshminë e një prej pronarëve të vilës, e cila ka dhënë deklarata kontradiktore. Vetë Malaj ka shpjeguar se ai nuk ka asnjë pronësi mbi atë vilë, por se aty, më parë, kishin banuar me qira disa të afërm të tij. Komisioni bëri publik edhe një raport të DSIK, i cili e përkufizonte Malajn të papërshtatshëm për dyshime për korrupsion dhe lidhje me persona me precedentë penale. Por KPK bëri me dije se komisionerët i hetuan në mënyrë të pavarur dyshimet dhe arritën në përfundimin se raporti i DSIK ishte i pasaktë.

Pas dy gjyqtarëve, ishte radha e Gentian Osmanit, Prokurorit të çështjes Tahiri të paraqitej në seancë dëgjimore përpara Komisionit të Pavarur të Kualifikimit.

Vendimi përfundimtar për karrierët e 4 magjistratëve do të jepet ditët në vijim.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.