Makinat e përdorura, “kolapson” importi – Gjatë Dhjetorit në rënie me 342%, çmimi mesatar për makinë rritet me 139%

Të dhënat më të fundit të tregtisë së jashtme tregojnë se, ndalimi i importit të makinave më të vjetra se 10 vite, nuk ka sjellë një rritje të importit të makinave të reja, pra të atyre të papërdorura, si dhe ka rikonfiguruar tërësisht tregun.

Nga të dhënat e Drejtorisë së Përgjithshme të Doganave, për muajin Dhjetor rezulton se, në Shqipëri kanë hyrë vetëm 246 autovetura të reja, për një vlerë totale prej 710 milionë lekësh, ose 5.6 milionë euro.

Pavarësisht se është në rënie në krahasim me nëntorin, kjo shifër nuk është aspak më e larta gjatë vitit, pasi në muajt Mars, Tetor, Qershor apo Prill ka pasur bindshëm më shumë.

Por, shifra më interesante është ajo që i referohet importit të makinave të përdorura gjatë dhjetorit. Të dhënat zyrtare nga Drejtoria e Doganave tregojnë se rënia është drastike. Gjatë Dhjetorit janë importuar në vendin tonë vetëm 1749 autovetura të përdorura, për një total prej 1.7 miliardë lekësh.

Kjo është padiskutim shifra më e dobët e vitit, me diferencë të ndjeshme me muajt paraardhës, rënie me 342% në krahasim me Nëntorin. Kjo do të thotë se, ligji ka detyruar tregtarët që të importojnë më pak, pra duke mos i zëvendësuar importet e tyre të mëparshme me importe të makinave më të reja se viti 2009.

Por, në këtë tendencë rëndon edhe fakti se, një muaj përpara hyrjes në fuqi të ligjit, tregtarët nxituan të krijonin stok, duke importuar edhe numrin më të madh historik të autoveturave të vjetra,  plot 7731 në 1 muaj, për një vlerë prej 3.2 miliardë lekësh.

Me hyrjen në fuqi të ligjit, vlera mesatare e makinave të vjetra të importuara është ngjitur nga 3300 euro, në 7900 euro.

Çmimi është rritur me më shumë se dy herë, në 139% dhe bëhet fjalë vetëm për çmimet e zhdoganuara, çka do të thotë se, në tregun me pakicë, çmimet do të jenë ndjeshëm më të larta.

Gjithsesi, një tendencë më e qartë do të vihet re gjatë muajve në vijim, kur edhe të tkurret stoku i krijuar nga tregtarët përpara hyrjes në fuqi të ligjit.

Ndërkohë, deri tani, të dhënat tregojnë se ligji i`a ka dalë të frenojë ndjeshëm hyrjen në treg të makinave të përdorura, paçka se nuk janë vënë re sinjale të forta të rritjes së importit të makinave të reja.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.