Makinat që blemë në tre vitet e fundit! Llojet e automjeteve që hynë në Shqipëri nga 2018 në 2020
Numri i mjeteve që janë prodhuar gjatë apo pas 2010 është rritur me 150% nga 8700 copë të hyra në 2018 në 12900 copë të hyra vitin e kaluar. Kjo tregon se flota e makinave që qarkullon në Shqipëri ka tendencën të kalojë drejt prodhimeve relativisht të reja.
Autoveturat e prodhuara në Gjermani dominojnë në rrugët e Shqipërisë. Kjo tendencë është theksuar edhe më tej në 2020, ku nga 43.661 autovetura, të regjistruara për herë të parë më shumë se 38 për qind e tyre janë vetëm të dy markave “Volkswagen” dhe “Mercedez-Benz”.
Nëse do ta rajonalizojmë tregun e makinave ai në pjesën më të madhe të tij shtrihet në rajonin Tiranë Durrës, ku në 2020 janë regjistruar më shumë se gjysma e mjeteve që kanë hyrë në vend. Nga 52,361 mjete që kanë hyrë gjithsej, në Tiranë e Durrws janë regjistruar mbi 28 mijë copë.
Drejtoria e Përgjithshme e Shërbimeve të Transportit Rrugor ka dhënë statistikat e detajuara për automjetet që kanë hyrë në Shqipëri përgjatë vitit 2020. Po ashtu ata janë krahasuar edhe me të dhënat që u përkasin viteve 2018 dhe 2019, ku bien në sy ndryshimet përkatëse. Në perudhën trevjeçare qarkullimit rrugor i janë shtuar edhe rreth 137 mijë autovetura.
Sipas të dhënave në dy vitet e fundit, 2019 dhe 2020 në qarkullim në Shqipëri kanë hyrë ndjeshëm më pak makina se sa në 2018. Në 2020 në vend u futën rreth 7 mijë mjete më pak se në 2018 dhe rritja e vitit 2020 krahasuar me një vit më parë është modeste. Por nga të dhënat del një lajm i mirë sa i përket shtimit të numrit të mjeteve që janë prodhime të reja.
Kështu nga 20 mijë mjete që ishin prodhuar para 2005 të hyra në 2018, dy vite më pas numri i tyre ka rënë në më pak se 3400 të tilla. Ndërkohë numri i mjeteve që janë prodhuar gjatë apo pas 2010 është rritur me 150% nga 8700 copë të hyra në 2018 në 12900 copë të hyra vitin e kaluar.
Kjo tregon se flota e makinave që qarkullon në Shqipëri ka tendencën të kalojë drejt prodhimeve relativisht të reja.
AUTOMJETE TË REGJISTRUARA NË PERIUDHËN 2018-2020
Viti i prodhimit | Hyrë në 2018 | Hyrë në 2019 | Hyrë në 2020 | |||
copë | Në % | copë | Në % | copë | Në % | |
Gjatë e pas 2010 | 8,707 | 17 | 12,010 | 28 | 12,939 | 29 |
Gjatë 2005-2009 | 21,535 | 43 | 24,433 | 57 | 27,358 | 63 |
Para 2005 | 20,379 | 40 | 6,238 | 15 | 3,364 | 8 |
Automjete gjithsej | 50,621 | 100 | 42,681 | 100 | 43,661 | 100 |
Burimi: Drejtoria e Përgjithshme e Shërbimeve të Transportit Rrugor
Llojet e mjeteve që hynë në 2020
Duket se shqiptarë kanë parësore autoveturat. Sipas të dhënave të publikuara nga Drejtoria e Përgjithshme e Shërbimeve të Transportit Rrugor, gjatë vitit 2020 rezulton të jenë regjistruar për herë të parë 52,361 mjete rrugore nga ku autoveturat zënë 83 për qind të numrit total të mjeteve. Llojet e tjera janë motomjetet me 6 për qind dhe automjetet për transport të përzier me 5 për qind.
Nga 43,661 autoveturat e regjistruara në 2020 në të gjithë vendin, analiza e të dhënave tregon se 29 për qind e tyre janë me vit prodhimi 2010 e sipër, 63 për qind me vit prodhimi 2005-2009 dhe 8 për qind me vit prodhimi më të vjetër se 2005.
Ndryshimi në shifra sipas zyrtarëve ka ardhur, si rrjedhojë e vendimit të qeverisë të marrë në 2018 për kufizimin e importit të mjeteve nën kategorinë mjedisore EURO4, si pjesë e politikave kundër ndotjes së ajrit dhe mbrojtjes së mjedisit. Kështu krahasuar me 2018, janë regjistruar për herë të parë 80 për qind më pak autovetura me vit prodhimi më të vjetër se 2005 ose janë 45 për qind më pak krahasuar me vitin 2019.
Ndërsa regjistrimet për herë të parë të autoveturave me vit prodhimi 2010 e lart janë shtuar ndjeshëm me 69 për qind krahasuar me vitin 2018, çka dëshmon se ka një tendencë për të zëvendësuar gradualisht mjetet e vjetra ndotëse.
Të detajuara sipas klasifikimeve të llojeve të mjeteve në 10 llojet e para që kanë hyrë në vend me sasitë përkatëse janë: autovetura 43.661 copë ose 83 për qind, motorë 3.355 copë ose 6 për qind, automjete për transport të përzier 2.575 copë ose rreth 5 për qind, dhe në më pak se 1 për qind janë kamionët 471 copë, makinat bujqësore 456 copë, automjete për transport të vecantë 422 copë, automjete tërheqës 305 copë, gjysëmrimorkiot 294 copë, automjete për përdorim të vecantë 223 copë dhe autobuzë 172 copë. Për llojet e tjera kanë hyrë më pak se 150 ekzemplarë.
Shitësit, statusi dhe vëllimi motorit
Në totalin e makinave që janë regjistruar në vend gjatë vitit 2020, 89 për qind e tyre kanë ardhur direkt nga importi dhe vetëm 11 për qind janë shitur nga nga koncesionarët ose shitësit e autorizuar.
Sipas të dhënave në 2020 koncensionarët dhe shitësit e autorizuar kaluan për klientët e tyre 5.883 mjete, ndërkohë që blerësit sollën vetë nga importi 46.478 automjete të llojeve të ndryshme, ku natyrisht autoveturat zënë peshën dërmuese. Bie në sy që numri i mjeteve të hyra direkt nga importi ka një lidhje shumë të përafërt me statusit e mjeteve të regjistruara, po aq pra 89 për qind e tyre janë me statusin: mjete të përdorura.
Në shifra rezulton që në 2020 në Shqipëri janë regjistruar për herë të parë 46,646 mjete të përdorura dhe 5,715 mjete të reja. Sa i takon vëllimi motorit, numri më i lartë i autoveturave ka një fuqi motorike deri në 2000 centimetra në kub duke zënë 69 për qind të tyre, të ndjekura nga autoveturat me vëllim 2001-2999 centimetra në kub me 29 për qind dhe autoveturat që kanë vëllim motorik më të madh ose 3000 centimetra në kub me 2 për qind.
Ndërsa sipas kriterit të lëndës djegëse të dhënat tregojnë se në vitin 2020, pjesa më e madhe e autoveturave të regjistruara, tre në katër ose 75 për qind, përdorin lëndën djegëse “naftë”. Mjetet me “benzinë” zënë 13 për qind të totalit dhe ata me lëndë djegëse të kombinuar “benzinë dhe gaz” zënë 10 për qind të totalit. Bien ë sy se numri i autoveturave që përdorin energji elektrike ose lëndë djegëse “naftë, “benzinë” ose “gaz” të kombinuara me “energji elektrike” është ende shumë i ulët. Makina elektrike kanë hyrë më pak 2000 copë.
Markat e makinave
Autoveturat e prodhuara në Gjermani dominojnë në rrugët e Shqipërisë. Kjo tendencë është theksuar edhe më tej në 2020, ku nga 43.661 autovetura, të regjistruara për herë të parë më shumë se 38 për qind e tyre janë vetëm të dy markave “Volkswagen” dhe “Mercedez-Benz”. Sipas të dhënave zyrtare në Shqipëri kanë hyrë 68 marka të ndryshme autoveturash.
Dhjetë markat më të shitura kanë qenë “Volkswagen” me 9,109 copë, “Mercedez-Benz” 7,338 copë, “Ford” 4,162 copë, “Toyota” 3,945 copë, “Daimler Chrysler” 3,453 copë, “Audi” 3,138 copë, “Opel” 1,846 copë, “BMË” 1,560 copë, “Fiat” 1,455 copë dhe “Hyundai” 866 copë.
Markat e tjera janë më të pakta në numër dhe mes tyre nuk mungojnë markat e luksit si “Cadillac” 7 copë, “Bentley” 5 copë, “Rolls Royce” 4 copë, dhe nga një ekzemplar “Buick” e “Mclaren” për tu mbyllur edhe me prodhimet ruse: 3 “Lada” dhe 1 “Volga”.
Ku shiten makinat
Nëse do ta rajonalizojmë tregun e makinave ai në pjesën më të madhe të tij shtrihet në rajonin Tiranë Durrës, ku në 2020 janë regjistruar më shumë se gjysma e mjeteve që kanë hyrë në vend. Të detajuara shifrat tregojnë që mjetet rezultojnë të jenë regjistruar më së shumti në Tiranë me 39 për qind të totalit, në Durrës 15 për qind e totalit dhge në vend të tretë Fieri me 10 për qind të totalit të mjeteve të regjistruara.
Ndërkohë të shprehura në numër rezulton që nga 52,361 që kanë hyrë gjithsej në vend në 2020, në Tirane janë regjistruar 20,664 copë, në Durrës 7,924 copë, Fier 4,981 copë, Elbasan 3,606 copë, Shkodër 3,051 copë, Laç 2,372 copë, Vlorë 2,276 copë, Korçë 2,023 copë, Berat 1915 copë, Peshkopi 1,083 copë, Kukës 1,061 copë, Sarandë 755 copë, dhe Gjirokastër 649 copë.
Ndërkohë duke e detajuar numrin e mjeteve që kanë hyrë sipas muajve të vitit rezulton që në 6-mujorin e parë të vitit ku karantina pati ndikim të lartë kanë hyrë mesatarisht 3,339 mjete në muaj, ndërsa në 6-mujorin e dytë, numri mesatar mujor ka qenë 5,388 mjete. Muajt me shifrën më të lartë të hyrjeve janë korriku me 5824 automjete dhe dhjetori me 5748 automjete, muaj të cilët përkojnë edhe me numrin më të lartë të ardhjes së emigrantëve pranë familjeve.
SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.