Malajzia, më keq se India / Ka më shumë raste me koronavirus për 1 milion banorë
Rastet ditore me Covid-19 të Malajzisë po rriten shpejtë dhe kanë kaluar Indinë me një tregues të rëndësishëm, sipas të dhënave zyrtare. India ka patur një valë të dytë shkatërruese që prej muajit Prill dhe ka regjistruar rastet ditore më të mëdha në botë. Megjithatë, infeksionet ditore të Malajzisë për 1 milionë banorë, në një mesatare 7-ditore, kanë kaluar atë të Indisë që prej fundjavës së kaluar. Statistikat e fundit tregojnë se Malajzia ka raportuar 205 raste për 1 milionë banorë, krahasuar me 150 raste të Indisë. Popullsia prej 32 milionë e vendit është shumë më e vogël se 1.4 miliardë në Indi. Përgjithësisht, numri i vërtetë i rasteve me covid-19 është më i lartë se i raportuari në të gjithë botën, kryesisht prej mungesës së testeve. Në Indi , shumë studime kanë zbuluar se rastet janë të nënraportuara. Megjithatë, kjo nuk është hera e parë që Malajzia tejkalon Indinë me infeksionet për 1 milionë banorë. Sipas “Our World in Data”, rastet për milionë banorë të Malajzisë kanë qenë më të larta se në Indi nga 15 Nëntori i vitit të kaluar deri më 27 Mars të këtij viti. Malajzia, një shtet në Azinë Juglindore, ka qenë në luftë me rritjen e rasteve të koronavirusit që në muajt e fundit të vitit 2020. Qeveria ka shtrënguar masat disa herë, por ka dështuar të aplikojë një karantinë të plotë/ Vendi raportoi një rritje ditore me 7,478 rastesh në 24 orët e fundit, duke e çuar totalin në 533,300. Malajzia ka miratuar për përdorim vaksinat e Pfizer, AstraZehenca dhe kinezes Sinovac. Qeveria ka bërë të ditur se synon të vaksinojë 80% të popullsisë deri në fund të vitit, por vetëm 5% kanë marrë të paktën një dozë deri më tani.
Klevis Llaha -SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.