Manastirliu flet për vaksinat: “Vonesa në të gjithë Europën. Brenda shkurtit vijnë dërgesat e para të COVAX.”
Ministrja e Shëndetësisë Ogerta Manastirliu, në fjalën e mbajtur në parlament, foli ndër të tjera për situatën e Covid-19. Manastirliu thekson se Shqipëria është në pritje të dërgesës së parë të vaksinave të Pfizer, ndërkohë që shtoi se problemi i vonesës së tyre është në të gjithë Europën për shkak të rritjes së kapacitetit të prodhimit që ka njoftuar kompania:
“Jemi në pritje të dërgesës së parë nga kompania Pfizer. Jemi besimplotë se Pfizer do t’i qëndrojë kontratës së lidhur për dërgesën e dozave të para të vaksinës sipas marrëveshjes.
Ndërkohë që instrumenti Covax është angazhuar të sjellë gjithashtu dozat e para të kompanisë Pfizer brenda muajit shkurt.” – u shpreh ministrja.
Ministrja deklaroi se janë kontraktuar doza vaksine antiCOVID për 800 mijë qytetarë, duke bërë me dije se janë parapaguar 2.9 milion dollarë për marrëveshjen me Pfizer, krahas parapagimit në instrumentin COVAX. Gjithashtu sipas saj po negociohet edhe me kompaninë AstraZeneca si dhe mundësia për të lidhur marrëveshje bilaterale me vendet e tjera:
“Qeveria shqiptare ka marrë masa në kohë për nënshkrimin e kontratave me të parën kompani që disponohej autorizimet e përdorimit të vaksinës. U angazhuam financiarisht në parapagimin e marrëveshjes së Pfizer-it dhe tashmë kemi paguar rreth 2.9 milion dollarë, si dhe kemi parapaguar në instrumentin e Covax-it për të garantuar sigurimin e vaksinave në një kohë të shpejtë.
Dhe po ashtu puna jonë po vijon për sigurimin e vaksinës së AstraZeneca-s dhe gjithashtu për të lidhur marrëveshjet bilaterale me vendet europiane për të siguruar dozat e tjera të vaksinave.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.