Manastirliu: Përforcim i shërbimit mjekësor gjatë ditëve të festave

Ministrja e Shëndetësisë dhe Mbrojtjes Sociale, Ogerta Manastirliu zhvilloi një takim gjatë ditës së sotme me ekipin e urgjencës së Spitalit Universitar të Traumës, spital i cili pret dhe numrin më të madh të urgjencave gjatë ndërrimit të viteve.

Takimi u mbajt në kuadër të masave shtesë të marra nga Ministria e Shëndetësisë dhe Mbrojtjes Sociale gjatë ditëve të festave për shtim të personelit në urgjencat mjekësore në të gjitha spitalet, qendrat shëndetësore, pikat kufitare dhe personel “on call” në rast nevoje.

“Kemi marrë të gjitha masat që natën e ndërrimit të viteve urgjencat mjekësore, ambulancat, njësia e helikopterëve të jenë në gatishmëri për t’iu përgjigjur të gjitha thirrjeve në rast nevoje. Ndalimi i tregtimit të fishekzjarrëve këtë vit pritet të lehtësojë edhe traumat që çdo vit shkaktohen nga fishekzjarrët dhe mjetet piroteknike”– tha Manastirliu.

Sipas njoftimit, janë vendosur ambulanca në të gjitha qytetet e Shqipërisë, në sheshet ku do të festohet ndërrimi i viteve nga ora 19:00 deri në përfundim të festës. Në Tiranë, përveç 9 autoambulancave të shpërndara në postacione në territor, sipas planit të riorganizimit të Urgjencës Mjekësore, do të ketë edhe dy autoambulanca të tjera në dispozicion të festës, të vendosura në sheshin Skënderbej përkatësisht midis Muzeut Kombëtar dhe Hotel “Tirana International” dhe para Bankës së Shqipërisë.

Gjithashtu, janë marrë masa edhe për shtimin e personelit me mjekë dhe infermierë në Njësinë e Koordinimit të Urgjencës Mjekësore, si edhe një ekip shtesë me mjekë dhe infermierë “on call”.

Masat e përforcuara do të zbatohen nga të gjitha ekipet mjekësore në datat 31, 1 dhe 2 janar 2019, sipas urdhrit të Ministres Manastirliu, për t’iu përgjigjur të gjitha thirrjeve në rast nevoje nga qytetarët. Po ashtu, Manastirliu falenderoi edhe ekipin mjekësor që do të shërbejë 24/7 në këto ditë festash.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.