Manaxhimi i pyjeve/5 Bashki problematike, nuk zbatojnë ligjin
Pesë janë bashkitë më problematike të cilat nuk kanë bërë asgjë sa i përket detyrimeve që ju ngarkon ligji për Pyjet dhe Shërbimin Pyjor. Bashkitë problematike janë, Kurbin, Durrës. Shijak, Vorë dhe Kamëz.
Sipas analizës vjetore për 2016 për Inspektoratin e Mjedisit pranë ISHMP vetëm 42 bashki kanë ngritur strukturat e manaxhimit të pyjeve dhe 12 janë në procese formimi të tyre.
Kryeinspektori Ergys Agasi u ndal në inspektimet e kryera si dhe masat ndëshkuese që do të merren për bashkitë që nuk kanë nisur të zbatojnë kompetencat që ju jep ligji.
Sa i përket importeve të lëndës drusore në vendin tonë ajo është rritur me 30 për qind për periudhën Shkurt 2016- Janar 2017. Sa i përket bashkive të cilat nuk kanë nisur të zbatojnë ligjin për manaxhimin e pyjeve ju është lënë dhe një afat i dytë deri në 31 mars për përmbushjen e tyre, në të kundër do të ketë ndëshkime administrative dhe penale siç i parashikon ligji.
Sipas të dhënave rezulton që rrethi i Korçës të jetë më problematiku ku janë kryer 1019 inspektime dhe janë vendosur gjoba me vlerë mbi 194 milionë lekë.
Në Tiranë janë kryer 315 inspektime dhe janë vendosur gjoba në vlerën e 35 milionë lekëve. Në Berat janë kryer gjithsej 922 inspektime dhe janë vendosur gjoba në vlerën e 25 milionë lekëve.
Në Dibër janë kryer 861 inspektime dhe janë vendosur gjoba në vlerën e 71 milionë lekë. Në Durrës gjatë 2016 janë kryer 256 inspektime dhe janë vendosur gjoba në vlerën e 5.8 milionë lekëve.
Elbasani ka rreth 1253 inspektime prej të cilave kanë rezultuar me gjobë në vlerën e 25 milionë lekëve. Në Fier janë kryer 442 inspektime dhe janë vendosur gjoba mbi 10 milionë lekë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.