Manifaktura amerikane shënon rekord – Hapi më i shpejtë në 7 muaj, nuk i trembet luftës tregtare
Prodhimi i Manifakturës në Shtetet e Bashkuara të Amerikës u përshpejtua gjatë muajit Nëntor me hapin më të shpejtë në 7 muaj, tregojnë të dhënat më të fundit. Edhe aktiviteti i shërbimeve u përshpejtua me një hap më të madh se pritshmëritë.
Këto të dhëna janë të radhës në serinë e atyre që tregojnë se ekonomia më e madhe në botë vazhdon t`i bëjë ballë turbullirave që vijnë nga lufta tregtare mes saj dhe Kinës.
Indeksi PMI i Markit, që është ndër indikatorët më të saktë të aktivitetit ekonomik u ngjit në 52.2 pikë gjatë Nëntorit në manifakturë, ndërsa për shërbimet u ngjit në 51.6 pikë. Niveli i 50 pikëve ndan rritjen nga kontraktimi.
Të dy indekset kanë prekur nivelin më të lartë që prej muajit Prill, si dhe rezultojnë lehtë mbi pritshmëritë e tregjeve dhe analistëve.
Pavarësisht këtyre të dhënave pozitive, ekonomia amerikane është ngadalësuar këtë vit, krahasuar me vitin e kaluar.
Kjo vjen pasi një vit më parë, ekonomia amerikane morri shtysë nga paketa e presidentit Trump për t`i dhënë stimuj ekonomisë nëpërmjet shkurtimit të taksave.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.