Maqedoni, kandidatët sot nënshkruajnë Kodin për zgjedhjet vendore
Nesër zyrtarisht fillon fushata zgjedhore për zgjedhjet lokale në Maqedoni. Nga Komisioni Shtetëror i Zgjedhjeve njoftuan se Kandidatët për kryetarë të komunave në Republikën e Maqedonisë dhe në Qytetin e Shkupit sot do të nënshkruajnë Kodin për zgjedhje demokratike dhe të drejta.
Në bazë të nenit 8-c të Kodit Zgjedhor, pjesëmarrësit në procesin zgjedhor duhet të nënshkruajnë Kodin për Zgjedhje të drejta dhe demokratike, shkruajnë mediat në Maqedoni.
Me këtë Kod, pjesëmarrësit në zgjedhjet lokale detyrohen dhe japin premtime për njëri-tjetrin, por edhe për të gjithë qytetarët e Maqedonisë, se do të mbështesin në mënyrë aktive, si dhe do të promovojnë parimet e zgjedhjeve të lira dhe të ndershme.
Garuesit me nënshkrimin e Kodit në mënyrë të qartë shprehin vullnetit e tyre për të respektuar të drejtën e votës e cila është e barabartë, e përgjithshme e drejtpërdrejtë, si dhe ushtrohet në zgjedhje të lira me votim të fshehtë.
Ceremonitë e nënshkrimit të Kodit organizohen nga Komisionet Komunale të Zgjedhjeve dhe Komisioni Zgjedhor i Qytetit të Shkupit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.