Maqedonia mendon ndërrimin e emrit për t’u anëtarësuar në NATO – Analistët skeptikë ndaj Zaev
Deklaratat e kryeministrit Zoran Zaev ditën e enjte rizgjuan një ide aspak të re e aspak të harruar. Maqedonia është gati t’i bashkohet NATO-s nën emrin Ish-Republika Jugosllave e Maqedonisë (FYROM).
Greqia e ka akuzuar prej kohësh Maqedoninë se ka përvetësuar emrin e rajonit verior grek me të njëjtin emër, dhe për këtë ka vendosur veton duke i bllokuar anëtarësimin në NATO e BE.
Sipas Zaev, me të hyrë në aleancën ushtarake, Maqedonia do të zgjidhte çështjen me grekët.
“Ka dy mënyra: ose të zgjidhim problemin, ose t’i bashkohemi NATO-s me një emër të përkohshëm dhe të vazhdojmë negociatat me Greqinë për problemin që ajo ka me emrin tonë kushtetuest të lidhur me intregrimin tonë drejt Bashkimit Europian. Ata janë në dijeni të plotë të dëshirës sonë për t’iu bashkuar Unionit Europian”, u shpreh Zaev.
Megjithatë analistët janë shumë pesimistë për shanset që një marrëveshje e tillë të arrihet së shpejti.
“Mendoj se Maqedonia do të këmbëngulë se FYROM është një emër i përkohshëm, ndërsa grekët do të shtyjnë për ta bërë të përhershëm, e kjo gjë do të vazhdojë përgjithmonë”, shprehet Milenko Nedelkovski, një analist politik dhe prezantues në një televizion në Shkup.
Sipas Nedelkovskyt, ajo çfarë ka rëndësi është se Maqedonia ka filluar të heqë dorë nga interesat kombëtare.
“Kjo do të ndiqet nga lëshime të ngjashme ndaj Shqipërisë, Bullgarisë apo gjithkujt tjetër, dhe pas disa vitesh Maqedonia do të jetë bërë e panjohshme”, paralajmëroi ai.
Megjithatë, ai beson se Greqia, duke qenë në borxh ndaj Gjermanisë dhe duke mos mundur t’i rezistojë presionit nga Uashingtoni, do të duhet të pranojë dëshirën e NATO-s për të shpejtuar anëtarësimin e Maqedonisë në aleancën prej 29 shtetesh.
Sakaq, Alexander Safonov, një njohës i Ballkanit i bazuar në Moskë thotë se Zaev është i gatshëm të sakrifikojë disa gjëra të konsideruara të rëndësishme nga qeveria e mëparshme.
“Duket sikur kabineti i mëparshëm i Gruevskit ishte më në linjë me politikat e Rusisë. Nuk jam i sigurt se të gjithë në Maqedoni e ndajnë dëshirën e tij për t’iu bashkuar NATO-s. Opozita me siguri do të akuzojë partinë në qeveri se po punon kundër interesave të vendit”.
Gjithsesi, Zaevit do t’i duhet përkrahja e dy të tretave të parlamentit, në konsultim me Gjykatën Kushtetuese, si edhe një referendum popullor për të ndërruar emrin e vendit.
Sipas analistëve Maqedonia ka probleme më serioze për t’u përballur se sa të zihen për emrin e shtetit.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.