“Maratona e Tiranës rrit të ardhurat në kryeqytet” – Veliaj: Janë zënë rreth 3 mijë shtretër hotelesh, do konsumohen 10 mijë vakte
Maratona e Tiranës pritet t’i shtojë kryeqytetit të ardhura të konsiderueshme, pasi janë rezervuar rreth 3000 shtretër hotelesh dhe do të konsumohen rreth 10 mijë vakte. Kështu është shprehur kryebashkiaku Erion Veliaj, gjatë një dalje për mediat, ku ndër të tjera theksoi se kjo është një mënyrë e mirë se si mund të “marketohet” kryeqyteti.
“Jam shume i kënaqur për Maratonën e Tiranës. Kemi pasur rreth 3000 shtretër hotelesh dhe do të konsumohen rreth 10 mijë vakte. Do të blihen suvenire dhe do të paguhet karburant. Kjo është një e ardhur shumë e mire ekonomike për qytetin. Një qytet që nuk ka det do të duhet që ta marketojë veten edhe me produkte të tjera, jo vetëm me “Pazarin e Ri”, jo vetëm me arkitekturën në “Sheshin Skënderbej”, por edhe me aktivitete sportive. Më në fund jemi futur në hartë edhe në këtë fushë ku kemi pasur një vakum. Ata që shkojnë vazhdimisht në maratona i kanë dhënë Tiranës notën 10 dhe për mua kjo është e rëndësishme”, u shpreh Veliaj.
Kryebashkiaku gjithashtu u shpreh se për vitin tjetër është caktuar data kur do të zhvillohet maratona dhe do të jetë 7 Tetor 2018, por nuk la pa përmendur edhe itinerarin më të mirë për këtë vrapim ku evidentoi edhe bllokimin e qytetit.
“Bëmë një eksperiment vjet me itinerarin në autostradë dhe është një itinerar i mirë edhe pse e bllokon qytetin për pak orë. Kjo është edhe ideja që qyteti të arrijë të marrë frymë. Makinat e kanë qytetin 364 ditë, një ditë është pa makina!
Maratona brenda qytetit është një mënyrë se si dikush bën një tur të shpejtë të Tiranës me këmbët e veta.”, u shpreh Veliaj.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.