Mario Draghi-studentëve: “Kthimi në monedhat e para euros? Ju bën për të qeshur, ashtu si dhe mua”

“Ju jeni brezi i parë i lindur me euron. Kur dëgjoni ata që duan të kthehen në monedhat e vjetra, juve u vjen vetëm për të qeshur. Edhe unë do të qeshja si ju”. Këtë e ka deklaruar Presidenti i Bankës Qendrore Europiane Mario Draghi, në një bashkëbisedim me studentët që vinin nga 10 shtete fituese të çmimit “Studentët e brezit të euros” në Frankfurt.

Sipas tij, shumica mbështet euron por më shumë dëgjohet zëri i atyre që e kritikojnë.

“Sondazhet dëshmojnë se pjesa më e madhe e qytetarëve mbështet euron por pastaj ndjehen shumë kritika që lidhen me faktin se kush ndihet më shumë. Ai që është i lumtur nuk duhet ta shprehë çdo ditë.

Kam lexuar një studim intresant të Bankës së Francës sipas të cilit, pjesa më e madhe e njerëzve e mbështet euron por mendon se ajo u ka sjellë më shumë avantazhe vendeve të tjera sesa vendit të tyre. Jemi pra në mendimin e zakonshëm se bari i komshiut është gjithnjë më jeshil se i yti” vijoi Draghi.

Duke qenë se mandati i përfundon në fund të tetorit të këtij viti, Draghi iu përgjigj pyetjes së një studenti duke thënë se nuk e di se çfarë do të bëjë pastaj dhe se nuk ka një plan.

“Me të vërtetë nuk e di. Dhe nuk po i bëj bisht pyetjes suaj. Kam akoma disa muaj dhe jam plotësisht i zënë me punën time. Nuk kam bërë asnjë lloj plani për të ardhmen time. Ndaj do ta shohim” tha Draghi.

Marrë me shkurtime nga Ilsole24ore/ Përshtati në shqip:SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.