Marrëdhënia e re Britani-BE – Brukseli pret bisedime të ashpra, paralajmëron për kufirin e Irlandës

Bashkimi Europian deklaroi se negociatat për marrëdhënien me Britaninë pas Brexit do të nisin Javën e ardhshme, por paralajmëroi se procesi do të jetë tejet i vështirë dhe mund të dështojë nëse Londra nuk respekton kushtin e kufirit me Irlandën.

Britania doli nga Bashkimi Europian më 31 Janar, pas më shumë se 3 vitesh të bisedimeve të lodhshme të divorcit.

Ndërkohë që të dy palët kanë ndërmarrë qasje të ashpër përpara negociatave, Irlanda paralajmëroi se edhe një marrëveshje bazike tregtare do të jetë e pamundur deri në fund të këtij viti, nëse Londra nuk respekton detyrimet kufitare sipas dakordësisë.

Ky mesazh u përforcua edhe nga negociatori i Brexit në Bashkimin Europian, Michel Barnier, që shtoi se raundi i parë i negociatave do të zhvillohet në Bruksel ditën e Hënë, ndjekur nga një raund i dytë në Londër më vonë gjatë Marsit.

“Objektivi primar i negociatave nga Mbretëria e Bashkuar është të sigurojë rikthimin e pavarësisë ekonomike dhe politike më 1 Janar 20201”, tha zëdhënësi i kryeministrit Boris Johnson.

Nën marrëveshjen komplekse të divorcit të arritur mes Britanisë dhe bllokut tregtar më të madh në botë,  Irlanda e Veriut qëndron në zonën doganore të Mbretërisë së Bashkuar, por tarifa do të aplikohen ndaj mallrave që kalojnë nga Britania në Irlandën e Veriut, nëse destinacioni përfundimtar është Irlanda apo Bashkimi Europian.

“Ne do respektojmë detyrimet”, tha zëdhënësi i Johnson, duke shtuar se përtej këtyre, nuk do të ketë ndryshime të tjera. Britania ka premtuar gjithashtu se nuk do të prezantojë kontrolle të reja tek kufiri tokësor me Irlandën.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.