Marrëdhëniet dypalëshe – Trump-Putin takim “kokë më kokë” në Samitin e G20
Presidenti amerikan, Donald Trump, do të zhvillojë një takim ‘kokë më kokë’ me homologun e tij rus, Vladimir Putin, në Samtin e G20 të shtunën. Sipas CNBC, ata pritet të diskutojnë privatisht në Buenos Aires, ku do të zhvillohet edhe Samiti, para se të bashkohen me zyrtarët e tjerë.
Ndihmësi i Kremlinit, Yuri Ushakov, tha për agjencinë e lajmeve shtetërore TASS se ende nuk është rënë dakord për orën që do të zhvillohet takimi.
Çarmatimi, anti-terrorizmi global si dhe marrëdhëniet e ardhshme bilaterale janë edhe çështjet kryesore që pritet të diskutojnë krerët e dy vendeve në takimin e të shtunës, sipas Ushakov.
Ndërkohë, zëdhënësi i presidentit Putin, Dmitri Peskov, tha për gazetarët:
“Së pari vijnë çështjet e lidhura me marrëdhëniet dypalëshe. Duhet të mendojmë se si të fillojmë të diskutojmë marrëdhëniet dypalëshe, sigurinë strategjike si dhe çarmatimin dhe konfliktet rajonale.”
Trump dhe Putin u takuan për herë të parë mes tyre në Samitin e G20 në Hamburg në korrik të këtij viti, ku deklaruan se do të bënin përpjekje për të rregulluar marrëdhëniet midis dy vendeve.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.