Marrëdhëniet ekonomike me Turqinë, Rama: Në 2017 tregtia u rrit me 10%, kemi kapacitet për më shumë

Rriten me 10% shkëmbimet tregtare mes Turqisë dhe Shqipërisë gjatë vitit 2017. Por kjo shifër është e vogël krahasuar me potencialin që kanë të dy vendet.

Kryeministri Edi Rama ka vlerësuar mbështetjen që do të japë Turqia për ndërtimin e aeroportit në Vlorë si dhe për asistencën që do të japë në krijimin e linjës së parë ajrore kombëtare shqiptare.

“Më vjen jashtëzakonisht mirë që ky do të jetë viti i lançimit të dy investimeve shumë të rëndësishme dhe mjaft simbolike për cilësinë e kësaj marrëdhënieje, investimi për ndërtimin e aeroportit të ri ndërkombëtar të Vlorës dhe investimi nga ana e kompanisë Turkish Airlines për të asistuar ngritjen e linjës sonë kombëtare ajrore.

Aeroporti i Vlorës do të jetë një stimul shumë i rëndësishëm për rritjen e ekonomisë dhe të punësimit, si dhe për fuqizimin e industrisë sonë të turizmit. Ndërsa linja e re ajrore kombëtare do të jetë më në fund një mundësi e re dhe e shumëpritur për të gjithë shqiptarët, që të kenë shtëpinë e tyre fluturuese”, u shpreh Rama.

Ambasadori turk në Tiranë është ndalur tek bashkëpunim ekonomik që kanë të dy vendet, duke premtuar se ky bashkëpunim do të vijojë edhe në të ardhmen.

Këto deklarata u bënë gjatë Asamblesë së Përgjithshme të  Dhomës së Tregtisë dhe Industrisë Shqiptaro- Turke, në Tiranë.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.