Marrëveshja e Brexit, fare pranë – Negociatorët europianë janë optimistë për “divorcin”, paundi rritet

Negociatorët e Brexit në Bashkimin Europian kanë bërë të ditur se marrëveshja e divorcit me Britaninë është shumë pranë arritjes.  Bashkimi Europian sinjalizoi se po shqyrton propozime të reja nga Britania për mënyrën se si të shmangin kontrollet e ashpra në kufirin e Irlandës pas Brexit, që është një nga çështjet kryesore në bisedime.

Pas lajmërimeve nga zyrtarët europian, paundi  u rrit në nivelin më të lartë në 10 javë, në 88.2 pens kundër euros dhe në 1.3053 kundër dollarit amerikan. Të dyja palët po përpiqen që të arrijnë në një dakordësi mbi divorcin si dhe për marrëdhëniet pas Brexit, ndërkohë që afron samiti i 17 Tetorit dhe takimi përfundimtar më 17 Nëntor.

Sipas anëtarëve të ekipit të Michel Barnier, negociatorit kryesor në Bruksel për Brexit,  po bëhet gjithashtu progres në çështje të tjera, përfshirë mbrojtjen e lëvizjes së lirë të mallrave nga origjina të veçanta.  Ekipi i Barnier deklaroi se është i hapur ndaj propozimit të planifikuar të Britanisë për ndreqjen emergjencë të kufirit me Irlandën, por që kjo nuk ka ardhur ende në mënyrë formale nga Londra.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.