Marrëveshja e huasë, rreth 66 milionë euro për përmirësimin e klimës së biznesit

Qeveria ka depozituar në Kuvend një tjetër marrëveshje huaje me Bankën Ndërkombëtare për Rindërtim dhe Zhvillim, marrëveshje e cila pritet të jetë një mbështetje buxhetore për Shqipërinë, për të financuar deficitin për vitin 2017.

Objektivi kryesor i programit thuhet se konsiston në kryerjen e reformave nëpërmjet përmirësimit të klimës së investimeve si dhe lehtësimit dhe zhvillimit të tregtisë. Marrëveshja e huasë që do të akordohet nga Banka Ndërkombëtare për Rindërtim dhe Zhvillim përllogaritet në shifrat e 65 milionë e 800 mijë eurove, me një maturim prej 25 vjetësh, duke përfshirë periudhën prej 5 vitesh pa pagesë principali.

Ky projektligj është në përputhje me Strategjinë e Zhvillimit të Biznesit dhe Investimeve për periudhën 2014-2020 të Ministrisë së Ekonomisë. Sipas projektligjit të depozituar në Kuvend, programi është i mbështetur në tre shtylla kryesore: Qeveria shqiptare në bashkëpunim me Bankën Botërore pritet të hartoje një ligj të unifikuar për investimet, i cili do të zëvendësojë ligjet ekzistuese që rregullojnë investimet dhe krijimin e mekanizmit për adresimin e shqetësimeve të investitorëve, pranë Agjencisë Shqiptare të Zhvillimit të Investimeve (AIDA).

Qëllim tjetër i kësaj marrëveshje është krijimi i lehtësive të të bërit biznes, për marrjen e lejeve të ndërtimit, të energjisë, të marrjes së licencave, për mbikëqyrjen e tregut dhe mbi të gjitha për të reduktuar barrën e procedurave administrative dhe kostot e biznesit.

Shtylla e tretë e programit thuhet se është lehtësimi i tregtisë, duke thjeshtuar procedurat doganore etj. Marrëveshja e huas është miratuar në parim nga Këshilli i Ministrave dhe është nënshkruar ndërmjet palëve. Marrëveshja pritet të hyjë në fuqi pas ratifikimit në Kuvendin e Shqipërisë.

Florenc Drizari/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.