Marrëveshja e klimës në BE / Vendet anëtare bien dakord për ligjin e reduktimit të ndotjes
Vendet e Bashkimit Europian dhanë në nisje të javës vulën e fundit të miratimit të një ligji, për të bërë ligjërisht detyruese objektivat e emetimit të gazrave serë në rajon, ndërkohë që politikëbërësit po përgatiten për një paketë të re gjigante të politikave kundër ndryshimit klimatik. Negociatorët në Parlament dhe vendet anëtare të BE, arritën një marrëveshje në Prill mbi ligjin e klimës, që cakton objektiva për të reduktuar emetimet neto të gazrave me 55% deri më 2030, nga nivelet e vitit 1990, ndërkohë që viti 2050 duhet të jetë në zero emetime. Ministrat e 27 vendeve të BE miratuan zyrtarisht marrëveshjen ditën e Hënë, përveç Bullgarisë, që ishte abstenim. “Kompromisi përfundimtar nuk reflekton pozitën tonë kombëtare mjaftueshëm”- deklaroi qeveria bullgare. Liderët nga të gjithë vendet e BE ranë dakord për objektivin e vitit 2030 në dhjetor, që synon të krijojnë një shteg që ,nëse ndiqet në të gjithë botën, mund të ndalojë ndikimet ekstreme të ndryshimit klimatik.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.