Marrëveshja-Kompania e njohur koreane vjen në Shqipëri! Aktiviteti nis këtë vit në Fier, 6.5 mln euro dhe 660 punonjës
Një ndër kompanitë e njohura në botë për prodhimin e elementeve elektrike të automjeteve ka hyrë zyrtarisht në Shqipëri, ku do të zhvilllojë aktivitetin e saj. Kompania nga Koreja e Jugut “Yura Corporation” ka vendosur të zhvillojë aktivitet në Shqipëri pas negociatave të zhvilluara më herët.
Ministrja e Financave dhe Ekonomisë, Anila Denaj, priti në një takim zyrtar përfaqësuesin e kësaj kompanie zotin Lukas Nam.
“Pasi bëmë një studim edhe në vendet e tjera të rajonit, zgjodhëm Shqipërinë për të investuar për shkak të fuqisë punëtore të kualifikuar, kostove konkurruese, pozitës gjeografike, si dhe incentivave lehtësuese nga ana e qeverisë shqiptare dhe suportit të AIDA-s”, u shpreh Nam.
Referuar njoftimit zyrtar, plani i biznesit i propozuar nga kjo kompani synon zhvillimin e zonës më një sipërfaqe rreth 4.9 ha, pronë shtetërore, e njohur si “Baza e Tubove” që ndodhet në Zhupan të Fier. Kjo zonë është përcaktuar si zonë me përparësi zhvillimi për këtë industri nga qeveria në 2018.
Aktiviteti ekonomik i “Yura””, do të fillojë në vendin tonë brenda vitit 2019, ku do të punësohen rreth 600 punonjës, ndërsa vlera e investimit është parashikuar 6,5 milion euro në fazën e parë. Faza e dytë e këtij projekti parashikon një ri-investim me 13 milion euro dhe numrin e punonjësve me 1100 vetë.
Në planet afatgjata kompania parashikon edhe hapjen e dy fabrikave të tjera në Shqipëri, me një numër total punonjësish rreth 4000 vetë.
Aktualisht “Yura” operon në shumë vende 12 vende të botës, me 60 fabrika në sektorin e prodhimit të sistemeve elektrike dhe pjesëve elektrike për automobilë, për kompani, si: Kia dhe Hyundai, AUDI, dhe Mercedes-Benz.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.