Marrëveshja në Kuvend/ Pas kredisë anti-Covid, edhe 60 milionë euro për turizmin nga Banka Ndërkombëtare për Rindërtim e Zhvillim  

Veç kredisë 15 milionë euro për përballimin e emergjencës së shkaktuar nga pandemia, Këshilli i Ministrave ka depozituar në Kuvend edhe një marrëveshje tjetër huaje me Bankën Evropiane për Rindërtim dhe Zhvillim, me vlerë 60 milion euro.

Referuar relacionit të marrëveshjes, huaja do të përdoret për programin për zhvillimin e turizmit dhe infrastrukturës në Shqipëri, në shumën prej 60 000 000 (gjashtëdhjetë milionë) eurosh. Shuma totale e financimit të programit është 100 milionë euro, nga ku: 40 milionë euro grant dhe 60 milionë euro hua.

Objektivi i përgjithshëm i programit është rritja e kontributit të turizmit të cilësisë dhe turizmit të qëndrueshëm për rritjen ekonomike e konkurrueshmërinë e rajoneve shqiptare.

Për komponentin 1, objektivat specifikë të programit janë:

1. ngritja e cilësisë dhe e qëndrueshmërisë së ofertës së integruar të turizmit në territoret pilote;
2. rritja dhe ruajtja e bukurisë tërheqëse të pasurive kulturore, natyrore dhe të tjera në territoret pilote për turistët.

Për komponentin 2, objektivi specifik i aksionit është të përmirësojë zhvillimin lokal e të qëndrueshëm të infrastrukturës parësore dhe të përmirësojë qëndrueshmërinë e saj në klimë, në kuadrin e politikës së zhvillimit rajonal shqiptar.

Për komponentin 3, objektivi specifik i programit është të përmirësojë ekosistemin inovativ e të nxisë krijimin e bizneseve.

“ Investimet që do të mbulohen nëpërmjet huas, sipas përcaktimeve në këtë projektvendim, do të synojnë kryesisht ndërhyrjet që synojnë përmirësimin e aksesit e të qëndrueshmërisë më të madhe të trashëgimisë kulturore, të pasurive natyrore, si dhe përmirësimin e infrastrukturës në të gjithë territorin e vendit në kuadër të planeve zhvillimore lokale dhe të kritereve të lejueshmërisë së këtij programi. 

Programi synon rritjen e kontributit të turizmit të qëndrueshëm dhe të përgjegjshëm ndaj rritjes ekonomike të Shqipërisë. Ai do të zbatojë dhe do të testojë modelin e zhvillimit ekonomik lokal të udhëhequr nga turizmi në territoret e bashkive Fier, Berat, Shkodër e Korçë, i përqendruar në një numër të modeleve pilot të trashëgimisë kulturore dhe natyrore, si dhe mjeteve të destinacioneve të tjera lokale.

Programi do të përmirësojë turizmin e qëndrueshëm e të përgjegjshëm, duke rigjeneruar kështu strukturën ekonomike lokale dhe mjedisin urban. Destinacione turistike më të shumta dhe më tërheqëse do të rrisin shpenzimet e turistëve, kohëzgjatjen e sezonit turistik, mundësitë e punësimit për popullsinë lokale dhe të ardhurat në zonat e synuara. Kjo shkon së bashku me një vizibilitet të lartë të mbështetjes së Bashkimit Evropian.

Modeli do të shtrihet në vende të tjera, të cilat do të zgjidhen në bazë të nevojave dhe të potencialeve të tyre për zhvillim lokal, në përputhje me politikën e zhvillimit rajonal shqiptar. Bashkitë mund të marrin mbështetje për përmirësimin e infrastrukturës së tyre, lidhjen rajonale dhe shërbimet bashkiake.

Programi do të zbatohet nga Fondi Shqiptar i Zhvillimit deri në vitin 2025” shkruhet në relacionin e marrëveshjes së depozituar në Kuvend.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.