Marrëveshja për peshkimin, firmos edhe Shqipëria – Mbledhje të dhënash dhe limitim i sasisë së peshkuar
Deri në vitin 2020, të dhënat për peshkimin në të gjithë Mesdheun do të mblidhen dhe do të studiohen rregullisht. Peshkatarët e flotave të vogla të peshkimit do të jenë kontribuuesit kryesorë në këtë drejtim, në një përpjekje për të shpëtuar këtë aktivitet.
Një deklaratë është nënshkruar në Maltë nga tetë vende anëtare të BE-së me dalje në Mesdhe si dhe nga shtatë vende të treta, përfshirë edhe Shqipërinë.
Detyra që angazhohen këto vende të zbatojnë është edhe lufta ndaj peshkimit ilegal. Ndërkohë ka nisur edhe procesi me një propozim për një plan shumëvjeçar për peshkimin në detin Adriatik.
Plani pritet të caktojë një limit kapjeje për specie të caktuara si sardelet, skumbritë dhe açuget, të cilat përbëjnë një nga eksportet kryesore të Shqipërisë dhe kapnin vlerën e 841 milionë lekëve në tremujorin e katërt 2016.
“Çdokush nga firmëtarët kanë një kuptim të gjerë për realitetin e përditshëm të peshkatarëve të rajonit. Flasin me ta dhe u dinë emrat, sepse disa kanë historinë e familjes të lidhur ngushtë me traditën e peshkimit. Prandaj kjo firmë ofron më tepër se sa pronësi politike. Ajo është rruga drejt rimëkëmbjes”, u shpreh komisioneri europian për peshkimin Karmenu Vella.
Sektori i peshkimit punëson mbi 300 mijë njerëz në të gjithë Mesdheun, nga ku 80% e tyre janë flota të vogla peshkimi (me mjete lundruese nën 10 metra të gjata). Këto flota të vogla kapin vetëm një të katërtën e gjithë sasisë së peshkuar.
Numri i këtyre vendeve të punës është duke u ulur, pasi sasia e peshkut në Mesdhe është duke u tkurrur. Mbi 90% e të gjitha llojeve janë duke u mbishfrytëzuar.
Nga kjo marrëveshje Shqipëria pritet të përfitojë edhe me asistencë teknike për sistemin e monitorimit të anijeve dhe sistemit të kontrollit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.