Marrëveshjet e ndaluara në tenderë-APP dhe Autoriteti i Konkurrencës zbulojnë “skema” të reja nga bizneset
Agjencia e Prokurimit Publik dhe Autoriteti i Konkurrencës kanë evidentuar disa praktika të dyshimta në drejtim të marrëveshjeve të ndaluara mes operatorëve ekonomikë për pjesëmarrjen në një garë tenderuese.
Sipas tyre, në momentin e përllogaritjes së vlerës së fondit limit, operatorët ekonomikë u japin autoriteteve kontraktore oferta me vlera shumë të larta, në krahasim me ofertat që ato paraqesin në tender për këtë objekt prokurimi.
Por, sipas Autoritetit të Konkurrencës ky veprim, shoqëruar me sjellje të dyshimta të operatorëve ekonomikë gjatë pjesëmarrjes në procedurat e prokurimit, si dhe pas lidhjes së kontratës mund të përbëjë një evidencë, për ekzistencën e marrëveshjeve të ndaluara në oferta.
Për këtë arsye, APP kërkon nga operatorët ekonomikë që të jenë më të përgjegjshëm gjatë llogaritjes së vlerës së fondit limit për një procedurë tenderuese , pasi paraqitja e ofertave me vlera shumë të larta në momentin e testimit të tregut për përllogaritjen e fondit limit, në krahasim me ato që paraqiten në tender mund të përbëjë shkak që autoritetet kontraktore t’i drejtohen Autoritetit të Konkurrencës.
Po ashtu, APP i kujton operatorëve ekonomikë se marrëveshjet e ndaluara çojnë në pengimin, kufizimin dhe shtrembërimin e konkurrencës në treg, çka përbën dhe shkelje ligjore.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.