Masa e re në Prishtinë / Lëvizja me transportin urban 1 muaj falas për qytetarët
Pas diskutimit në Kuvendin Komunal të Prishtinës, kryetari Shpend Ahmeti ka deklaruar se duke filluar nga 1 dhjetori do të jetë falas lëvizja me transportin urban për të gjithë qytetarët e Kosovës.
Pavarësisht propozimit dhe dëshirës së mirë për ta zgjatur këtë masë në mbi 4 muaj, kryetari Ahmeti është shprehur se ajo do të kishte ndikim të drejtpërdrejtë në buxhetin e vitit 2021, i cili ende nuk është miratuar dhe në këtë mënyrë është gjetur kompromisi për ta vënë fillimisht në zbatim për 1 muaj, duke e rishikuar më vonë si masë së bashku me efektet financiare.
Ahmeti ka thënë se të gjitha rregullat dhe masat mbrojtëse kundër COVID-19 mbeten në fuqi dhe janë̈ të obligueshme për secilin që udhëton me autobusë.
Njoftimi i plotë
“Qarkullimi me autobusët e Trafikut Urban do të jetë falas për të gjithë qytetarët për një muaj rresht, duke filluar nga nesër 1 dhjetor. Zbatimi i të gjitha rregullave dhe masave mbrojtëse kundër COVID-19 mbeten në fuqi dhe janë të obligueshme për secilin që udhëton me këta autobusë.
Në mbledhjen e parafundit të Kuvendit Komunal, asambleistët e Partisë Demokratike të Kosovës (PDK) kanë propozuar dhe ka kaluar rekomandimi për transport publik falas për 4 muajt në vijim. Përkundër propozimit të mirë, vendime të tilla që afektojnë buxhetin nuk mund të merren pa ndryshuar buxheti.
Sivjet mund ta bëjmë por për vitin 2021 nuk kemi buxhet të miratuar sepse Kuvendi i Republikës ende nuk e ka vendosur. Por edhe në buxhetin që e kemi dërguar ne nuk është e paraparë. Prandaj pas dhjetorit do ta vlerësojmë situatën e re varësisht nga buxheti dhe nga situata financiare në përgjithësi. Të vazhdojmë të jemi të kujdesshëm dhe të ndërgjegjshëm për mbrojtjen e shëndetit tonë dhe të tjerëve rreth nesh”, shkruan Ahmeti.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.