Masa të reja për parandalimin e COVID-19 – Austria do të ndalojë të pavaksinuarit në kafene, pas rritjes së infektimeve
Austria do të ndalojë të gjithë personat që nuk janë plotësisht të vaksinuar kundër COVID-19, të hyjnë në kafene, restorante apo në parukeri, pasi infeksionet po i afrohen rekordit të vendosur një vit më parë dhe qeveria përpiqet të bindë qytetarët që të vaksinohen. Afërsisht 64% e popullsisë së Austrisë është plotësisht e vaksinuar kundër COVID-19, në përputhje me mesataren e Bashkimit Europian, por një nga normat më të ulëta në Europën Perëndimore. Shumë austriakë janë skeptikë në lidhje me vaksinat, siç është Partia e Lirisë së ekstremit të djathtë, partia e tretë më e madhe në parlament.
Infeksionet e reja ditore janë rritur dhe të premten u regjistruan në 9,388, pranë rekordit prej 9,586 të vendosur një vit më parë, kur hyri në fuqi i dyti nga tre bllokimet kombëtare.
“Ecuria e infektimeve është e jashtëzakonshme dhe shtrimet në repartet e kujdesit intensiv po rriten ndjeshëm dhe më shpejt nga sa prisnim,” tha kancelari Alexander Schallenberg në një konferencë për mediat, duke shtuar se masat e reja do të hyjnë në fuqi të hënën e 8 nëntorit.
Ndër të tjera, këto masa përfshijnë ndalimin e të pavaksinuarve nga hotelet dhe eventet e më shumë se 25 personave.
Do të ketë një periudhë tranzicioni prej katër javësh në të cilën një vaksinim i parë plus një test PCR do të lejojë pranimin në vendet ku të pavaksinuarit do të ndalohen. Pas kësaj, do të lejohen vetëm të vaksinuarit plotësisht dhe ata që janë shëruar së fundmi nga COVID.
Njoftimi nga qeveria e udhëhequr nga konservatorët, vjen një ditë pas një lëvizjeje të ngjashme nga qyteti i Vjenës i udhëhequr nga socialdemokratët, që ka shkallën më të ulët të infeksionit midis nëntë provincave të Austrisë, por përqindjen më të lartë të shtretërve të kujdesit intensiv të zënë nga pacientët me COVID-19, në 20%.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.