Masa të shtuara për koronavirusin – Manastirliu: Urdhër për higjienën në shkolla. ISHP: Presim rezultatet për 1 rast të dyshuar
Në Shqipëri nuk është konfirmuar asnjë rast me koronavirusin e ri, ndërkohë që Instituti i Shëndetit Publik po pret rezultatet e analizave për një rast të dyshuar. Gjatë mbledhjes së task-forcës, ministrja e Shëndetësisë dhe Mbrojtjes Sociale, Ogerta Manastirliu rikonfirmoi se pas rasteve të shtuar në Itali janë përforcuar masat e kontrolleve në pikat kufitare, ndërkohë që në 24 orë janë kontrolluar 4500 pasagjerë të ardhur nga vende me transmetim komunitar ku futet dhe vendi fqinj.
Si pjesë e masave, ministrja tha se ka firmosur urdhrin për masa të shtuara higjieno-sanitare në institucionet arsimore.
Manastirliu tha se me shkallën e rrezikshmërisë që paraqet vendi ynë nuk janë parashikuar masa për mbylljen e kufijve dhe shkollave. Ndërkohë që apeloi që të gjithë qytetarët që dyshojnë se janë prekur nga COVID 19 të telefonojnë numrin 127 dhe të mos iu drejtohen institucioneve shëndetësore. Gjithashtu, sikurse rekomandon dhe Organizata Botërore e Shëndetësisë kërkohet një higjienë e shtuar personale.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.