Masat ekonomike, krahasim me Europën/ Instituti i Vienës: Paketa sa 1.2% e PBB-së, norma e dytë më e lartë në rajon

Instituti i Vienës për Studime ekonomike ndërkombëtare ka vlerësuar të gjitha vendet e Europës qendrore, lindore dhe juglindore sa i përket masave ekonomike që janë ndërmarrë për të përballuar emergjencën Covid-19.

Ndër 23 shtete të marra në analizë, për 21 prej tyre ka një vlerësim konkret të masave të ndërmara, në raport me prodhimin e brendshëm bruto. Të dhënat janë deri më 30 mars. Sipas Institutit të Vienës për Studime Ekonomike Ndërkombëtare, masat fiskale që ka ndërmarrë qeveria shqiptare si ndihmë për njerëzit dhe biznesin fiksohen në rreth 22 miliardë lekë, që përkthehet në 1.2% të prodhimit të brendshëm bruto të vendit.

Por si është kjo normë krahasuar me vendet e tjera të analizuara?

Krahasuar me rajonin e Ballkanit Perëndimor, Shqipëria është e dyta, pas Malit të Zi, me 1.4% të PBB-së, ndërkohë që Serbia me 0.4% të PBB-së, Maqedonia e Veriut me 0.5%, Kosova me 0.4% dhe Bosnje Hercegovina me vetëm 0.3% të PBB-së masa fiskale për të përballuar krizën, janë bindshëm më mbrapa se vendi ynë.

Jashtë rajonit, vetëm Rusia me 1% të PBB-së dhe Hungaria me 0.9% kanë injektuar një paketë ekonomike më të zbutur se Shqipëria në raport me ekonominë e vendit. Për të gjitha vendet e tjera, norma ngjitet, deri në 7.4% në rastin e Kroacisë, që është një vend me ndikim të lartë të turizmit në ekonomi, dhe pritej që pasojat e pandemisë globale të jenë drastike në vend.

Edhe për Shqipërinë, një sërë institucionesh, përfshirë vetë Institutin e Vienës për Studime Ekonomike Ndërkombëtare kanë ngritur alarmin se turizmi do të sjellë një ngërc në ekonomi, e për rrjedhojë duhet mbështetur.

Masat fiskale të qeverisë në raport me PBB në rajon

Mali i Zi     1.4% e PBB-së

Shqipëri  1.2% e PBB-së

Maqedoni e Veriut 0.5% e PBB-së

Kosovë    0.4% e PBB-së

Serbi         0.4% e PBB-së

Bosnje Hercegovina   0.3% e PBB-së

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.