Masat shtrënguese, si kanë ndikuar në ekonomi? – Banka Qendrore e Austrisë bën krahasimin mes vendeve kandidate, jemi ndër më të prekurit

Banka Qendrore e Austrisë ka publikuar raportin më të fundit, atë të tremujorit të 4-t për integrimin europian, ku në analizë merren ekonomitë e vendeve të cilat aspirojnë të bëhen pjesë e Bashkimit Europian, mes të cilave është edhe Shqipëria. Raporti shërben si një analizë për të kuptuar se si kanë ndikuar masat shtrënguese në ekonomitë e këtyre vendeve, bazuar në shifrat e tremujorit të dytë të vitit, atëherë kur edhe u aplikuan fillimisht masat shtrënguese, të cilat ishin edhe më të ashprat.

Shifrat tregojnë se, Shqipëria ka regjistruar rënien e tretë më të madhe të Prodhimit të Brendshëm Bruto gjatë kësaj periudhe, në terma vjetorë, me një kontraktim prej 10.2%, më mirë vetëm se Mali i Zi dhe Maqedonia e Veriut, ndërkohë që Serbia, Bosnje Hercegovina dhe Kosova kanë regjistruar të treja norma rënie më të ulta se vendi ynë.

Një tjetër indikator, ai i prodhimit industrial gjatë tremujorit të dytë të vitit, në rënie me 22% krahasuar me të njëjtën periudhë të një viti më parë, e vendos Shqipërinë në vendin e dytë në rajon, pas Maqedonisë së Veriut, për rënien më të madhe. Edhe indikatori i rritjes së pagave mesatare bruto na vendos në pozita aspak të favorshme, pasi regjistrojmë rritjen e dytë më të ulët në rajon, me 2.9% rritje, më mirë vetëm se Mal i Zi. Norma e inflacionit ndërkohë, në 1.9% në tremujorin e dytë, i jep Shqipërisë vendin e parë në rajon, dhe të dytin mes vendeve të analizuara, pas Ukrainës.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.