Matura shtetërore 2019 – Në janar nisin aplikimet online për në universitete
Ministria e Arsimit ndryshe nga vitet e tjera këtë herë i ka lënë më shumë kohë maturantëve të përgatiten për degën të cilin ata do të përzgjedhin për të vijuar studimet e larta.
Formulari A1, që plotësojnë maturantët tashmë është gati që prej datës 20 dhjetor dhe e publikuar prej dy ditësh në portalin e Ministrisë së Arsimit por edhe në atë të Qendrës së Shërbimeve Arsimore ku shoqërohet me një udhëzues.
Udhëzuesi për formularin A1 dhe A1z do të jetë në portalin e-Albania ku maturantët mund të bëjnë on line aplikimin nga data 7 deri në 15 janar për të vijuar më pas me aplikimin në portalin Matura shtetërore në datat 16 janar deri në 6 shkurt të vitit 2019. Sipas kalendarit që do të përcaktohet nga qendra e shërbimeve arsimore.
Brenda muajit shkurt do të përfundojnë të gjitha aplikimet si edhe do të kryhen korrigjimet përkatëse në sistem.
Një tjetër risi për këtë vit për maturantët është dhe reduktimi i numrit të provimeve me zgjedhje ku ata do të zhvillojnë vetëm një nga dy provime me zgjedhje që kanë qenë në vitet e kaluara.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.