Matura Shtetërore, testimi në ambiente të mëdha – Nikolla: Jo diskriminim, por siguri për vlerësimin
Ministrja e Arsimit, Sportit dhe Rinisë, Lindita Nikolla ka sqaruar nxënësit për provimet e Maturës Shtetërore lidhur me vendin ku do të zhvillohen ato.
Përmes një njoftimi zyrtar, Nikolla është shprehur se testimi në ambientet e mëdha do të shërbejë si instrument sigurie për të vlerësuar ata që dinë dhe për të marrë notën që meritojnë. Ndërkohë, ka shtuar se nuk duhet parë në asnjë mënyrë si diskriminim.
“Është një vendim që është për të gjithë maturantët e Shqipërisë, sepse duam që të mos diskriminohesh ti nga disa të tjerë që dinë ta vërtisin kopjen përfshi brenda këtu edhe administratorë të papërgjegjshëm. Është shumë e rëndësishme kjo gjë. Fakti që ne kemi zgjedhur sallat e mëdha, nuk ka të bëjë me diskriminimin tuaj por për të shkuar haka tek i zoti”, u shpreh Nikolla gjatë takimit në kuadër të turit të llogaridhënies me banorët e fshatit Strum të Fierit.
Më tej, ministrja u ndal gjithashtu edhe te cilësuar e mësuesve në sistem, duke sjellë në vëmendje Portalin Mësues për Shqipërinë si dhe reformën në fakultetet e edukimit. Sipas saj, përmes këtij portali iu jepet mundësia mësuesve me diplomat më të mira që të zgjidhen dhe të caktohen nëpër shkollat e vendit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.