Mbajtja e maskave nga të vaksinuarit / Fauci debat me senatorin: Ka variante që i shpëtojnë vaksinave

Eksperti i sëmundjeve infektive në SHBA, Anthony Fauci, u përplas me senatorin e Kentucky Rand Paul mbi efektshmërinë e veshjes së maskave gjatë një seance dëgjimore.

Paul argumentoi se të vaksinuarit nuk duhet të detyrohen të vendosin maska, pasi nuk kanë shanse të transmetimit të infeksionit. Ai shtoi se shkenca nuk e mbështet veshejen e maskave pas vaksinimit. Gjatë një debati të nxehtë Fauci u kundërpërgjigj se nuk është fare dakord me senatorin duke thënë se ka disa variante në SHBA, për të cilët vaksinat nuk ofrojnë mbrojtje të saktë.

Udhëzimet aktuale nga zyrtaret e shëndetësisë këshillojnë njerëzit që janë vaksinuar plotësisht të mund të takohen pa maska në ambiente të brendshme me grupe të vogla që janë vaksinuar gjithashtu. Megjithatë, ata duhet të shmangin udhëtimet e panevojshme dhe të vazhdojnë të mbajnë maska në publik.   Heqja graduale e masave të kufizimit është ende e vështirë pavarësisht rritjes së numrit të të vaksinuarve. Presidenti Joe Biden i bëri thirrje amerikanëve që të qëndrojnë vigjilentë dhe të vazhdojnë të ndjekin rregullat e CDC.  Agjencia ka thënë se njerëzit e vaksinuar plotësisht duhet të vazhdojnë të shmangin mbledhjet e mëdha dhe të veshin maska kur takojnë njerëz të pavaksinuar.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.