Mbajtja e maskës me detyrim, Koni: “Masë e panevojshme dhe me kosto për qytetarët”

Nismën  e qeverisë për mbajtjen  e maskës me detyrim  përgjatë gjithë kohës , mjeket e konsiderojnë të panevojshme. Në një intervistë për televizionin SCAN, mjeku Artan Koni  e vlerëson këtë nismë të tepërt dhe me kosto për qytetarët.

“Nuk është e nevojshme për mendimin tim të mbahet edhe në ambiente të hapura, por edhe kur njeriu është i vetëm që nuk ka të tjerë përqark pasi distancimi fizik është më i rëndësishmi.

Sa maska duhet të ndërrojmë në ditë, pasi sa herë ne hamë, apo pimë ujë unë vendos një tjetër maskë dhe na duhen 7-8 apo të tilla në ditë dhe në një vend si Shqipëria ku shumica e popullsisë e kalon me 1 euro e gjys dita si do ta arrijmë diçka të tillë.

I pyetur per situatën  aktuale të pandemisë dhe mjekimin që po përdoret për të sëmurët, Koni u përgjigj për mungesë transparence,  vecanërisht  sa i takon protokollit të mjekimit .

“Organet duhet të jenë transparente pse po merret një masë e tillë. Kemi një fluks të shtuar të pacientëve apo kush është arsyeja. E dyta të hapin debatin nëse duhet realisht një masë e tillë apo jo, pasi përveç kësaj mase ne mund të marrim masa të tjera që mund të rezultojnë akoma edhe më të efektshme, për shembull një prej tyre mund të ishte  përmirësimi i protokollit të kurimit të pacientëve, që ti trajtonim me ilaçe antivirale dhe jo me antibiotikë siç po veprojmë momentalisht.”

Në këtë stinë virozash mjeku apelon  për qytetarët zbatimin e masës veçanërisht atë të higjienës dhe distancimin fizik  për të shmangur  infektimin nga COVID-19.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.