Mbaron gjysma e parë “e tortës së eksportit” për 2021 – Ku “dërgoi” Shqipëria?

Janë publikuar të dhënat zyrtare për tregtinë e jashtme, sa i takon pjesës së parë të vitit. Referuar Instat, shtetet me të cilat Shqipëria ka rikuperuar ndjeshëm eksportin krahasuar me janar – qershor 2020, janë Italia, Kosova, Greqia dhe Spanja.

Sipas të dhënave të Instat, në 6 mujorin e parë të këtij viti, Shqipëria ka eksportuar 75.2 miliardë lekë mallra drejt Italisë; 18.1 miliardë më shumë se për të njëjtën periudhë të vitit pandemik.

Ndërkaq, mallrat e eksportuara drejt Kosovës për po të njëjtën periudhë të 2021 kapin vlerën 17.2 miliardë lekë. Rikuperim ky, në vlerën 6.9 miliardë lekë. Sa i takon Greqisë dhe Spanjës, rritja e eksportit në janar – qershor 2021 është përkatësisht me 4.3 miliardë lekë dhe me 3.3 miliardë lekë.

Nga ana tjetër, vendet me të cilat eksportet kanë pasur uljen më të madhe janë Mbretëria e Bashkuar, me afro 28%, si dhe Ukraina, me 39% (krahasuar me janar – qershor 2020).

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.