Mbërrijnë edhe 8 ton materiale të mbrojtjes personale për stafet mjekësore në vend
Ministrja e Shëndetësisë ka njoftuar sot se kanë mbërritur në Shqipëri edhe 8 ton mjete te mbrojtjes personale për stafet mjekësore, të financuara nga qeveria shqiptare në kuadër të masave për përballimin e situatës së shkaktuar nga COVID-19.
“Janë 8 ton materiale të mbrojtjes personale, duke filluar nga veshjet, syzet, maskat dhe helmetat mbrojtëse, të cilat do të vijojnë të furnizojnë spitalet tona, qendrën e urgjencës kombëtare, Institutin e Shëndetit Publik, si dhe të gjithë njësitë e kujdesit shëndetësor vendor e ato struktura ku personeli përballet në betejën dhe në frontin e parë të luftës kundër COVID-19”, tha Manastirliu e pranishme në doganë gjatë mbërritjes së materialeve.
Kjo sasi e re e mjeteve të mbrojtjes personale për stafet mjekësore vjen pas dy furnizimeve të para, prej 15 ton, të cilat kanë mbërritur më herët në vendin tonë. Sa i përket masave të reja, Manastirliu tha se nuk duhet të ulet vigjilenca e qytetarëve pasi lufta nuk ka mbaruar dhe duhet vazhduar me respektimin e masave të vendosura nga qeveria.
🔴Mbërrijnë edhe 8 ton mjete të mbrojtjes personale për personelin mjekësor. Mbetet përparësi e jona mbrojtja e mjekëve dhe infermierëve në vijën e parë të përballjes me 🤜COVID19🤛#BASHKË
Posted by Ogerta Manastirliu on Monday, April 13, 2020
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.