Mbërrin charteri i parë me turistë izraelitë, Klosi: Gjatë gjithë sezonit presim 300 të tillë
Në Rinas ka mbërritur charteri i parë me 100 turistë nga Izraeli, të cilët u pritën nga ministri i Turizmit Blendi Klosi në pikën e parë “Smile Albania”.
“Sot ishte një ditë e veçantë pasi kompania Albawings solli grupin e parë të turistëve izraelitë me charter dhe kjo do të vazhdojë përgjatë gjithë sezonit, prandaj ne zgjodhëm që të ishim këtu këtë mëngjes, të mirëprisnim turistët izraelitë dhe po ashtu të inauguronim pikën tonë të informacionit e cila brenda projektit Smile Albania do të jetë një nga pikat më interesante të të gjithë programit, pasi në këtë pikë do të mirëpriten të gjithë turistët që do të vijnë nëpërmjet aeroportit të Rinasit”.
Pas charterit të parë të drejtpërdrejtë nga Izraeli, javën e ardhshme do të vijë edhe charteri i parë nga kompania Israir, duke çuar në 4 numrin e charterave në javë.
“IsraAir fillon fluturimet javën tjetër duke e çuar në 4 numrin e charterave që vijnë drejtpërsëdrejti nga Izraeli në Rinas dhe po ashtu gjatë gjithë sezonit turistik pritet që të vijnë rreth 300 chartera të cilët do të sjellin turistë jo vetëm nga Izraeli, Skandinavia, Polonia, Çekia, Lituania por edhe nga Anglia, Gjermania dhe priten edhe surpriza të reja të cilat ne do t’i shpalosim ditë pas dite gjatë sezonit turistik”.
Në të gjithë vendin 1 mijë të rinj do të vendosen në pikat e projektit “SMILE Albania” për të mikpritur dhe informuar turistët.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.