Mbërritja e vaksinave të COVID-19, Manastirliu: “Më 1 mars vijnë 15 mijë doza Pfizer, brenda 10 ditëve edhe 14 mijë AstraZeneca”
Ministrja e Shëndetësisë, Ogerta Manastriliu bëri me dije se në datën 1 mars do të mbërrijnë 15 mijë vaksina, si pjesë e kontratës që qeveria shqiptare ka me kompaninë Pfizer, ndërkohë brenda 10 ditëve të para të marsit pritet edhe mbërritja e 14 mijë doza të vaksinës AstraZeneca, si pjesë e mekanizmit COVAX. Deklaratat e ministres u bënë nga qendra e vaksinimit në stadiumin Air Albania, ku shoqërohej nga kryeministri Edi Rama.
Ndërkaq, Rama tha se sfidë mbetet shtrirja e vaksinimit në popullatën e gjerë, ndërkohë që ndryshe nga herët e tjera, ku ka deklaruar se pritet mbërritja e 360 mijë dozave nga një vend mik, ai nuk preferoi të japë më tepër detaje.
Ministrja e shëndetësisë tha se aktualisht numri i mjekeve dhe infermierëve të vaksinuar ka arritur në 13 mijë, ndërkohë që janë edhe 800 të moshuar dhe staf i qendrave rezidenciale të përkujdesit që sipas saj gjithashtu janë vaksinuar. Sipas të dhënave zyrtare, deri më tani në vendin tonë kanë mbërritur 17 355 doza, të Vaksinës Pfizer.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.