BE mbështet reformën e ujit – 28 milionë euro grante në 2018 për kanalizimet dhe kapacitetet e menaxhimit të integruar të ujit
Qeveria shqiptare do të ketë mbështetjen e Bashkimit Europian për reformën e ujit dhe masat e ndërmarra në këtë drejtim. Angazhimin e konfirmoi zëvendës ambasadorja e Gjermanisë, Anke Holstein, gjatë inaugurimit të ujësjellësit në Lezhë.
“Dëshiroj t’ju siguroj juve zoti Kryeministër dhe ministër Gjiknuri, mbështetjen tonë të plotë në reformën e ujit që keni ndërmarrë. Masat e tanishme për t’i dhënë fund informalitetit janë të nevojshme, po aq sa edhe reformat në kuadrin ligjor, institucional dhe financiar”, deklaroi Holstein.
BE do të asistojë Shqipërinë edhe përmes granteve në këtë sektor, të cilësuar si prioritar për të arritur pastrimin e ujërave bregdetare. Gjatë dekadës së fundit, BE ka mbështetur vendin me mbi 110 milionë euro grante, nga të cilat 80% për grumbullimin dhe trajtimin e ujërave të zeza në rajonet bregdetare.
Delegacioni i BE-së shprehet në një deklaratë për shtyp se “shpreson ta përsërisë formulën e bashkëpunimit të suksesshëm me po këta partnerë në sektorin e ujit: mundësia konkrete mund të përfaqësohet nga një program i ri investimi sektorial për ujin dhe kanalizimet në Shqipëri, për të cilin BE-ja planifikon të kontribuojë deri në 24 milionë Euro grante të propozuara në kuadrin e programit kombëtar IPA 2018 për Shqipërinë”.
Një program i dytë synon gjithashtu të mbështesë përmes një granti prej 4 milionë eurosh ndërtimin e kapaciteteve në menaxhimin e integruar të ujit dhe menaxhimin e ujërave të zeza, së bashku me bashkëpunimin austriak dhe gjerman.
Dy programet pritet të fillojnë shumë shpejt në vitin 2018.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.