Mbështetje për reformat, ministrja Denaj takohet me Zv/drejtorin Ekzekutiv të FMN dhe Zv/Presidentin e BB në takimin vjetor
Ministrja e Financave dhe e Ekonomisë znj. Anila Denaj dhe Guvernatori i Bankës së Shqipërisë, Gent Sejko, vijojnë takimet me përfaqësues të lartë të FMN dhe BB në SHBA.
Referuar njoftimit zyrtar të Ministrisë së Financave , takime të rëndësishme janë zhvilluar me Tao Zhang, Zv/Drejtor Ekzekutiv i FMN dhe Poul Thomsen, drejtorin e FMN për Evropën, ku Ministrja Denaj, i informoi mbi situatën ekonomike, politikat makro-ekonomike dhe fiskale që po ndjek Ministria e Financave dhe Ekonomisë.
“Ministrja vlerësoi gjatë këtyre takimeve se ruajtja e balancës primare pozitive, menaxhimi dhe ulja e mëtejshme e borxhit publik dhe ruajtja e deficitit nën normën e 2%, mbeten objektiva të të dyja palëve për të shmangur ndikimin e ngadalësimit të rritjes ekonomike në Evropë” njofton Ministria e Financave.
Gjithashtu gjatë takimit me z. Cyril Muller, Zv/President për Evropën dhe Azinë Qendrore në BB, dhe znj. Van Gelder, Drejtoreshën për Ballkanin Perëndimor u rikonfirmua mbështetja e Bankës Botërore në sektorë të rëndësishëm të ekonomisë siç është energjia, transporti, tregtia si dhe për të nisur bashkëpunime të reja në projekte me fokus zhvillimin e SME-ve, sektorin e arsimit dhe menaxhimin e mbetjeve urbane. Muller shprehu vlerësimet për reformat e qeverisë shqiptare duke evidentuar ecurinë e mirë dhe arritjet në kuadrin e politikave fiskale, monetare dhe financiare, si dhe konfirmoi mbështetjen dhe bashkëpunimin e mëtejshëm me Bankën Botërore.
Ndërkohë zyrtarët e lartë të këtyre institucioneve të rëndësishme financiare ndërkombëtare mbështesin vijimin e mëtejshëm të konsolidimit fiskal, si dhe konfirmuan vazhdimësinë e asistencës nga ana e tyre për rritjen e kapaciteteve në administratën tatimore dhe hartimin e Strategjisë Afatmesme të të Ardhurave në Shqipëri.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.