‘Mbështetje për zhvillimin e Ballkanit’ – Varhelyi: Të punojmë së bashku për të shmangur çdo konflikt që del nga Ballkani Perëndimor!
Komisioneri i zgjerimit i BE-së, Oliver Varhelyi, deklaroi se mbështetja në zhvillimin e Ballkanit do të përkthehej në siguri dhe stabilitet për të gjithë rajonin. Gjatë një paneli “BE takohet me Forumin e Ballkanit” në Sofje, Varhelyi tha se nëse vendet kandidate do të drejtonin reformat sociale dhe ekonomike, si dhe do të forconin sundimin e ligjit dhe parimet demokratike në terren, BE-ja nuk mund t’i shpërfillte ato.
I zhgënjyer nga mungesa e përparimit në negociatat aktuale të zgjerimit, Varhelyi tha se “Ne duhet t’u besojmë fuqive tona. Dhe unë mendoj se të gjitha vendet anëtare duhet t’i besojnë natyrës transformuese të procesit të pranimit. Hendeku social dhe ekonomik midis BE-së dhe Ballkanit, si dhe reformat institucionale të munguara përbëjnë sfidat kryesore për anëtarësimin e Ballkanit në bllok”.
Varhelyi u kërkoi vendeve anëtare dhe atyre kandidate të punojnë së bashku, duke thënë se “ne duhet të punojmë së bashku për të shmangur çdo konflikt që del nga Ballkani Perëndimor, sepse nuk është vetëm Ballkani Perëndimor që do të preket drejtpërdrejt, por edhe Europa, i gjithë kontinenti”.
Tema kryesore e forumit këtë vit ishte “Mësimi i Ukrainës: Zgjerimi i BE-së si kundërpërgjigje ndaj luftës”. Shumë politikanë, vendimmarrës dhe ekspertë të ndryshëm nga BE-ja dhe Ballkani Perëndimor diskutuan strategjinë e BE-së për rajonin.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.