Mbetjet e ngurta – Menaxhohen më pak gjatë 2017

Menaxhohen më pak mbetje të ngurta për vitin 2017 në krahasim me një vit më parë. Referuar të dhënave të INSTAT, janë menaxhuar 1.2 milionë ton mbetje nga 1.3 milionë tonë që u menaxhuan në vitin 2016.

Në Shqipëri mbetjet e ngurta urbane hidhen në kazanët e grumbullimit të mbetjeve përgjithësisht të pandara sipas llojit. Që nga viti 2013 sasia vjetore e mbetjeve të gjeneruara për banorë, në shkallë vendi është rritur. Kështu në vitin 2017 kjo sasi ishte 386 kg/banor, nga 373 kg/banor që ishte në vitin 2016.

Ndërkohë që mbulimi i popullatës me shërbime komunitare për menaxhimin e mbetjeve urbane ka shënuar rritje prej 0,2 %, krahasuar me të njëjtin tregues në vitin 2016. Depozitimi i mbetjeve në landfille ka pësuar një rënie në shkallë vendi në 2017.

Gjatë vitit  u depozituan 77,5 % e sasisë totale të mbetjeve në landfille, ndërsa në vitin 2016 u depozituan 77,7 %. Ndërsa riciklimi ka pësuar një rritje fare të lehtë.

Ajo që bie në sy nga të dhënat është fakti se struktura e subjekteve që menaxhojnë mbetje mbështetur në fonde publike është ulur, ndërkohë që janë rritur subjektet e personave privat që merren me menaxhimin e mbetjeve.

Një lajm i mirë është fakti se gjenerimi i mbetjeve urbane në 2017 është  ulur në 1.8 milionë tonë, nga një rritje e frikshme që ndodhi në vitin 2015 dhe 2016, respektivisht me 2.4 milionë dhe 2.2 milionë ton.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.